An Pinakadakulang Tawo na Nabuhay Kasuarin Pa Man
Kapitulo 27: An Pag-apod ki Mateo
Dai nahaloy pakatapos na paomayan an paralitiko, si Jesus luminuwas sa Capernaum pasiring sa Dagat nin Galilea. Sa giraray may mga kadaklan na nagdorolok sa saiya, asin sia nagpoon sa pagtokdo sainda. Mantang sia naglalakaw, naheling nia si Mateo, na inaapod man na Levi, na nagtutukaw sa binubuhisan. “Sumunod ka sako,” an pag-agda ni Jesus.
Posible na si Mateo dati nang pamilyar sa mga katokdoan ni Jesus, arog man ki Pedro, Andres, Santiago, asin Juan kan sinda apodon. Asin arog sainda, si Mateo tolos-tolos na naghimate sa imbitasyon. Sia nagbuhat, binayaan an saiyang mga paninimbagan bilang parasingil nin buhis, asin suminunod ki Jesus.
Kan huri, puwedeng sa pagselebrar kan pag-ako nia sa pag-apod, si Mateo naggibo nin dakulang bangkete sa saiyang harong. Apuwera ki Jesus asin kan Saiyang mga disipulo, an dating kairibaiba ni Mateo yaon duman. An mga lalaking ini sa parate hinahamak kan saindang mga kapwa Judio huli ta sinda nagsisingil nin buhis para sa kinaoongisan na Romanong mga autoridad. Dugang pa, sinda parateng nangingikil sa mga tawo nin mas dakol na kuwarta kisa sa regular na singil nin buhis.
Naheling si Jesus sa bangkete kaiba kan siring na mga tawo, an mga Fariseo hinapot an saiyang mga disipulo: “Taano an saindong paratokdo ta nagkakakan sa kaibanan nin mga parasingil nin buhis asin parakasala?” Sa pakadangog kan hapot, sinimbag ni Jesus an mga Fariseo: “An mga marahay an salud dai nangangaipo nin parabolong, alagad an naghehelang iyo. Kaya paduman kamo asin aramon an kahulogan kaini, ‘An boot ko pagkaherak, bakong atang.’ Huli ta ako napadigdi sa pag-apod, bakong kan matanos, kundi kan mga parakasala.”
Malinaw na inimbitaran ni Mateo sa saiyang harong an mga parasingil na ini nin buhis tangani na makahinanyog sinda ki Jesus asin mag-ako nin espirituwal na pagpaomay. Kaya si Jesus nakiiba sa sainda tanganing tabangan sinda na magkamit nin marahay na relasyon sa Dios. Si Jesus dai hinahamak an mga siring na tawo, arog kan ginigibo kan nagpapakangmatanos sa sadiri na mga Fariseo. Imbes, napahiro nin pagkaherak sia garo baga naglilingkod bilang espirituwal na parabolong ninda.
Kaya an gibo nin pagkaherak ni Jesus sa mga parakasala bakong pagkonsinte sa saindang mga kasalan kundi bilang kapahayagan kan iyo man sanang pagmakolog na saiyang ipinaheling sa mga may helang sa pisikal. Girumdomon, halimbawa, kan maheherakon niang rinani asin dinootan an daoton, na sinasabing: “Boot ko. Luminig ka.” Kita logod magpaheling man nin pagkaherak paagi sa pagtabang sa mga tawong nangangaipo, nangorogna na tinatabangan sinda sa espirituwal na paagi. Mateo 8:3; 9:9-13; Marcos 2:13-17; Lucas 5:27-32.
▪ Haen si Mateo kan maheling sia ni Jesus?
▪ Ano an hanapbuhay ni Mateo, asin taano an siring na mga tawo ta hinahamak kan ibang mga Judio?
▪ Ano an reklamo tumang ki Jesus, asin paano sia nagsimbag?
▪ Taano si Jesus ta nakiiba sa mga parakasala?