An Pinakadakulang Tawo na Nabuhay Kasuarin Pa Man
Kapitulo 36: An Dakulang Pagtubod nin Sarong Opisyal sa Hukbo
KAN itao ni Jesus an saiyang Sermon sa Bukid, haros nangangabangaan na sia sa saiyang ministeryo sa publiko. Nangangahulogan ini na igwa na sana siang natatadang sarong taon asin mas o menus siyam na bulan tanganing tapuson an saiyang gibohon digdi sa daga.
Si Jesus ngonyan naglaog sa siudad nin Capernaum, sarong pinakabase sa saiyang mga aktibidad. Digdi an kamagurangan na lalaki kan mga Judio nagdolok saiya na may ipinakikiolay. Isinugo sinda nin sarong opisyal sa hukbo nin Roma na sarong Gentil, sarong tawo na may laen na rasa kisa sa mga Judio.
An namomotan na surogoon kan opisyal sa hukbo naghihingagdan na sa grabeng helang, asin boot nia na paomayan ni Jesus an saiyang surogoon. An mga Judio maigot na nakimaherak sa kapakanan kan opisyal: “Sia angay sa pagtao mo kaini sa saiya,” sabi ninda, “huli ta namomotan nia an satong nasyon asin sia mismo an nagtogdok kan sinagoga para sa sato.”
Mayo nin pag-alangan, si Jesus naghale kaiba kan mga lalaki. Alagad, kan harani na sinda, an opisyal sa hukbo nagsugo nin mga katood tanganing magsabi: “Ginoo, dai ka na mahadit, huli ta bako akong angay na palaogon ka sa sirong kan sakong atop. Sa dahelan na iyan dai ko ibinilang an sakong sadiri na angay na pumadian sa saimo.”
Mapakumbaba nanggad na pananaram para sa sarong opisyal na natuod nang magparamanda sa iba! Pero sia posible man na nag-iisip manongod ki Jesus, na narerealisar na an kaugalean nagbabawal sa sarong Judio sa pagkakaigwa nin sosyal na pakiibaiba sa mga bakong Judio. Maski si Pedro nagsabi: “Kamo nakakaising gayo na bako nanggad sono sa katogonan na an sarong Judio makiiba o dumolok sa tagaibang rasa.”
Tibaad habo nia na si Jesus magtios sa ibubunga kan pagbalga sa kaugalean na ini, isinugo kan opisyal an saiyang mga katood na makiolay manongod saiya: “Sabiha an tataramon, asin togoting maomayan an sakong surogoon. Huli ta ako tawo man na ibinugtak sa irarom nin autoridad, na igwa nin mga soldados na nasasakopan ko, asin nagsasabi ako sa sarong ini, ‘Paduman ka!’ asin sia minaduman, asin sa saro pa, ‘Madia!’ asin sia minadolok, asin sa sakong oripon, ‘Giboha ini!’ asin ginigibo nia iyan.”
Bueno, kan madangog ini ni Jesus, sia nagngalas. “Sinasabi ko saindo an katotoohan,” an sabi nia, “mayo nin siisay man sa Israel an nakuanan ko nin siring kadakulang pagtubod.” Pakapaomaye sa surogoon kan opisyal, ginamit ni Jesus an okasyon tanganing isaysay kun paano an bakong mga Judio na may pagtubod tatawan nin mga bendisyon na sinayumahan kan daing pagtubod na mga Judio.
“An dakol,” sabi ni Jesus, “hale sa subangan asin sa solnopan madaratong asin masarandig sa lamesa sa kaibanan ni Abraham asin Isaac patin Jacob sa kahadean kan kalangitan; alagad an mga aki kan kahadean iaapon sa kadikloman sa luwas. Duman mangyayari an saindang pagtangis asin an pagragot kan saindang mga ngipon.”
‘An mga aki kan kahadean na iinapon sa kadikloman sa luwas’ iyo an mga Judio sa laman na dai nag-ako kan oportunidad na enot na iinalok sainda na magin mga hade kaiba ni Cristo. Si Abraham, Isaac, asin Jacob nagrerepresentar sa areglo sa Kahadean nin Dios. Kaya si Jesus nagsasaysay kun paano an mga Gentil aakoon na sumandig sa langitnon na lamesa, sabi ngani, “sa kahadean kan kalangitan.” Lucas 7:1-10; Mateo 8:5-13; Gibo 10:28.
▪ Taano an mga Judio ta nakimaherak sa kapakanan kan sarong Gentil na opisyal sa hukbo?
▪ Ano an puwedeng magpaliwanag kun taano si Jesus ta dai inagda kan opisyal na lumaog sa saiyang harong?
▪ Ano an boot sabihon ni Jesus sa saiyang pantapos na mga tataramon?