Taano ta Nag-aasenso an mga Maraot?
“TAANO an mga maraot ta padagos na nabubuhay?” An hapot na ini haloy nang ihinapot kan maimbod na si Job, asin dakol nang beses na inotro iyan poon kan saiyang kaaldawan. Posibleng nasa isip iyan kan dakol na tawo sa teritoryo kan dating Yugoslavia (siring kan babae na ipinapaheling sa samong tutob) na ipinagtatangis an mga nagsasakit sa makaturotristeng guerra. Taano man nanggad ta an maraot na mga tawo nagdadanay asin nag-aasenso pa ngani? Siring sa sinabi ni Job, sa parate “an saindang mga harong katoninongan mismo, mayo nin katatakotan, asin an sogkod nin Dios mayo sa sainda.”—Job 21:7, 9.
Boot daw sabihon kaini na mayo nin halaga an paglilingkod sa Dios, pagkamoot nin saro sa kataed, asin paglikay sa paggibo nin sala? Dai nanggad! An Biblia nagtatao sato kan tamang pagmansay kan iyan magsabi: “Dai mo paghingoahon na daogon an mga paragibo nin maraot o arogon an mga naggigibo nin sala. Huli ta siring sa doot sinda tolos-tolos na naluluyos, asin nawawara siring sa berdeng doot nin tigsoli. Manarig ka sa KAGURANGNAN asin gumibo ka nin karahayan.”—Salmo 37:1-3, The New English Bible.
Iyo, an garo baga pag-asenso kan mga maraot temporaryo sana. Sa katunayan, an saindang buhay halipoton, mantang an mga naglilingkod sa Dios igwa nin mamuraway na paglaom para sa ngapit. Sa dai mahaloy, an panuga nin Dios maootob: “Papahidon [nin Dios] an gabos na luha sa saindang mga mata, asin an kagadanan mawawara na, dai na sagkod magkakaigwa nin pagmondo ni pagtangis ni kolog. An enot na mga bagay nakalihis na.” (Kapahayagan 21:4) Solamenteng mga matanos, bakong mga maraot, an makakaheling kan panahon na iyan. Kanigoan kanakapakokosog na rumani sa Dios asin makanood na gibohon an saiyang kabotan, gurano man karaot kan mga nakapalibot sa sato!
Kun gusto nindo nin dugang na impormasyon o gusto nindong songkoon kamo nin saro na makikipag-adal sa saindo sa Biblia nin daing bayad, tabi sumurat sa Watch Tower, P.O. Box 2044, 1099 Manila, o sa angay na direksion na nalilista sa pahina 2.