An Pinakadakulang Tawo na Nabuhay Kasuarin Pa Man
Kapitulo 70: Pagpaomay sa Sarong Tawong Namundag na Buta
Kan hingoahon kan mga Judio na gapoon si Jesus, dai sia naghale sa Jerusalem. Kan huri, kan Sabbath, sia asin an saiyang mga disipulo naglalakaw sa siudad kan makaheling sinda nin sarong lalaki na buta na poon sa pagkamundag. An mga disipulo hinapot si Jesus: “Rabi, siisay an nagkasala, an lalaking ini o an saiyang mga magurang, kaya sia namundag na buta?”
An mga disipulo tibaad nagtutubod, siring kan pagtubod nin ibang rabi, na an saro puwedeng magkasala sa matris kan saiyang ina. Pero nagsimbag si Jesus: “An tawong ini dai nagkasala ni an saiyang mga magurang, kundi ini tanganing an mga gibo nin Dios mahayag sa saiyang kamugtakan.” An pagigin buta kan lalaki bakong bunga nin espisipikong sala o kasalan na nakomitir kan arin man sa lalaki o kan saiyang mga magurang. An kasalan kan enot na tawong si Adan nagbunga kan pagigin bakong sangkap kan gabos na tawo, asin sa siring napapairarom sa mga depekto na arog baga nin pagkamundag na buta. An depektong ini sa lalaki nagtatao ngonyan nin oportunidad ki Jesus na ipahayag an mga gibo nin Dios.
Idinoon ni Jesus an pagkaapurado sa paggibo kan mga ini. “Gibohon niato an mga gibo nia na nagsugo sa sako mantang aldaw,” an sabi nia. “Nagdadangadang an banggi na mayo nin siisay man na makakagibo. Mantang ako nasa kinaban, ako iyo an liwanag kan kinaban.” Dai mahahaloy an kagadanan ni Jesus ibubugsok sia sa kadikloman kan lolobngan kun saen mayo na siang magigibong ano man. Mientras tanto, sia an gikanan nin kaliwanagan sa kinaban.
Pakasabiha kan mga bagay na ini, si Jesus naglutab sa daga asin paagi sa laway naggibo nin laboy. Ibinugtak nia ini sa mga mata kan buta asin nagsabi: “Magramos ka sa tangke nin Siloam.” Kuminuyog an lalaki. Asin kan gibohon nia iyan, nakakaheling na sia! Kanigoan an pag-ogma nia sa saiyang pagbalik, na nakakaheling na sia sa kaenot-enote sa saiyang buhay!
Napangalas an kataraed asin ibang nakakabisto saiya. “Ini an lalaki na dating nagtutukaw asin nakikilimos, bako daw?” an hapot ninda. “Sia ini,” an simbag kan iba. Pero an iba dai makapaniwala kaiyan: “Bako man, kundi nakakaumagid sia sa saiya.” Pero an lalaki nagsabi: “Ako iyo sia.”
“Paano, ngani, nabuklat an saimong mga mata?” an boot maaraman kan mga tawo.
“An tawong inaapod Jesus guminibo nin laboy asin iwinarak iyan sa sakong mga mata asin nagsabi sa sako, ‘Paduman ka sa Siloam asin magramos.’ Kaya nagduman ako asin nagramos asin nagkamit nin pagheling.”
“Haen an tawong idto?” an hapot ninda.
“Dai ko aram,” an simbag nia.
Inibanan ngonyan kan mga tawo an dating buta pasiring sa saindang relihiyosong mga namomoon, an mga Fariseo. An mga ini man nagparahapot saiya kun paano sia nagkamit nin pagheling. “Nagbugtak sia nin laboy sa sakong mga mata, asin ako nagramos asin nagkaigwa nin pagheling,” an paliwanag kan lalaki.
Sierto nanggad, maninigong ikaogma kan mga Fariseo an naomayan na parapakilimos! Pero imbes, idinenunsiar ninda si Jesus. “An tawong ini bakong hale sa Dios,” an sabi ninda. Taano ta sinasabi ninda ini? “Huli ta dai sia nag-ootob kan Sabbath.” Asin minsan siring an ibang Fariseo nagngangalas: “Paano an tawong parakasala makagigibo nin siring na mga tanda?” Kaya nagkaigwa nin pagkabaranga sa tahaw ninda.
Kaya, hinapot ninda an lalaki: “Ano an masasabi mo manongod sa saiya, huling binuklat nia an saimong mga mata?”
“Sia sarong propeta,” an simbag nia.
An mga Fariseo nagsayumang tubodon ini. Kombensido sinda na siertong igwa nin hilom na kasundoan si Jesus asin an lalaking ini tanganing dayaon an mga tawo. Kaya, tanganing resolberan an bagay, inapod ninda an mga magurang kan parapakilimos tanganing hapoton sinda. Juan 8:59; 9:1-18.
▪ Ano an dahelan kan pagigin buta kan lalaki, asin ano an bakong dahelan kaini?
▪ Ano an banggi na mayo nin tawong makakagibo?
▪ Kan maomayan an lalaki, ano an reaksion kan mga nakakabisto saiya?
▪ Paano nagkabaranga an mga Fariseo huli sa pakapaomay sa lalaki?
(Ipagpapadagos sa masunod na luwas.)