An Pinakadakulang Tawo na Nabuhay Kasuarin Pa Man

Kapitulo 71: Tuyong Dai Pagtubod kan mga Fariseo

AN MGA magurang kan dating butang parapakilimos natakot kan sinda apodon na umatubang sa mga Fariseo. Aram ninda na napagdesisyonan nang an siisay man na nagpapahayag nin pagtubod ki Jesus palalayason sa sinagoga. An siring na pagputol nin pakikiiba sa iba sa komunidad puwedeng magdara nin dakulang kasakitan, nangorogna sa pobreng pamilya. Kaya maingat an mga magurang.

“Ini an saindong aking lalaki na sabi nindong namundag na buta?” an hapot kan mga Fariseo. “Kun siring, napaano ta nakakaheling na sia ngonyan?”

“Aram mi na ini an samong aking lalaki asin na sia namundag na buta,” an pagpapatunay kan mga magurang. “Alagad kun napaano ta sia nakakaheling na ngonyan dai mi aram, o kun siisay an nagbuklat kan saiyang mga mata dai mi aram.” Siertong iinestorya sa sainda kan saindang aki an gabos na nangyari, pero may pag-iingat na nagsabi an mga magurang: “Hapota nindo sia. Sia nasa edad na. Dapat siang magtaram dapit sa saiyang sadiri.”

Kaya, inapod giraray kan mga Fariseo an lalaki. Sa panahon na ini hiningoa nindang humaon sia paagi sa pagsabi na nakatipon sinda nin nagpapatunay na ebidensia tumang ki Jesus. “Magtao ka nin kamurawayan sa Dios,” an ipinagboot ninda. “Aram mi na an tawong ini parakasala.”

Dai pinaindahan kan dating butang lalaki an saindang sahot, na nagsasabing: “Kun baga sia parakasala dai ko aram.” Pero idinagdag nia: “Sarong bagay an aram ko, na, minsan ako dating buta, ako nakakaheling na ngonyan.”

Sa paghihingoang makakua nin sala sa saiyang testimonya, naghapot giraray an mga Fariseo: “Ano an ginibo nia saimo? Paano nia binuklat an saimong mga mata?”

“Sinabihan ko na kamo,” an reklamo kan lalaki, “asin dai pa kamo naghinanyog. Taano ta boot nindong madangog giraray iyan?” May pagtuya siang naghapot: “Habo nindong magin saiyang mga disipulo man, bako daw?”

Ikinaanggot kan mga Fariseo an simbag na ini. “Ika sarong disipulo kan tawong idto,” an sahot ninda, “alagad kami mga disipulo ni Moises. Aram mi na an Dios nagtaram ki Moises; alagad kun manongod sa tawong ini, dai mi aram kun saen sia hale.”

Nagpapahayag nin pagkabigla, an mapakumbabang parapakilimos suminimbag: “Ini siertong sarong ngangalasan, na dai nindo aram kun saen sia hale, alagad binuklat nia an sakong mga mata.” Anong konklusyon an makukua digdi? Idinoon kan parapakilimos an inaakong pasisikadan: “Aram niato na an Dios dai naghihinanyog sa mga parakasala, alagad kun an siisay man natatakot sa Dios asin naggigibo kan saiyang kabotan, sia naghihinanyog sa sarong ini. Poon pa kan suanoy dai pa noarin man nadangog na an siisay man nakapabuklat sa mata nin saro na namundag na buta.” Sa siring, malinaw an konklusyon: “Kun an tawong ini bakong gikan sa Dios, mayo sia nin ano man na magigibo.”

An mga Fariseo mayong ikasimbag sa siring kaprangka, kalinaw na pangangatanosan. Dai ninda maako an katotoohan, kaya linibak ninda an lalaki: “Ika lubos na namundag sa kasalan, asin tinotokdoan mo kami?” Huli kaini, ilinuwas ninda an lalaki, na malinaw na pinalalayas sia sa sinagoga.

Kan mabaretaan ni Jesus an saindang ginibo, hinanap nia an lalaki asin nagsabi: “Minatubod ka sa Aki nin tawo?”

Sa pagsimbag, an dating butang parapakilimos naghapot: “Siisay sia, ginoo, tanganing tumubod ako sa saiya?”

“An nakikipag-olay sa saimo iyo an sarong iyan,” an simbag ni Jesus.

Tolos-tolos na an lalaki duminuko sa atubangan ni Jesus asin nagsabi: “Minatubod ako sa saiya, Kagurangnan.”

Dangan ipinaliwanag ni Jesus: “Sa paghokom na ini ako napadigdi sa kinaban na ini: tanganing an mga dai nakakaheling makaheling asin an mga nakakaheling magin buta.”

Huli kaiyan, an mga Fariseo na naghihinanyog naghapot: “Bako man kaming mga buta, bako daw?” Kun aakoon ninda na sinda buta sa pag-isip, igwa kutana nin sarahotan sa saindang pagtumang ki Jesus. Siring kan isinabi sa sainda ni Jesus: “Kun kamo buta, mayo kutana kamo nin kasalan.” Pero, may katagasan nin puso na iininsister ninda na sinda bakong buta asin dai nangangaipo nin espirituwal na kaliwanagan. Kaya si Jesus nagkomento: “Ngonyan kamo nagsasarabi, ‘Nakakaheling kami.’ An saindong kasalan nagdadanay.” Juan 9:​19-41.

▪ Taano ta natakot an mga magurang kan dating butang parapakilimos kan sinda apodon na umatubang sa mga Fariseo, asin sa siring paano sinda nagsimbag na may pag-iingat?

▪ Paano hiningoa kan mga Fariseo na humaon an dating butang lalaki?

▪ Anong lohikong argumento kan lalaki an ikinaanggot kan mga Fariseo?

▪ Taano an mga Fariseo ta mayo nin ikakapanarahotan sa saindang pagtumang ki Jesus?