Gurano an Sarong Biblia?
AN LIBRERIYA nin Britania dai pa sana nahaloy na uminoyon na magbayad nin haros $1,600,000 para sa sarong kopya kan traduksion ni William Tyndale kan Kristianong Griegong Kasuratan sa Ingles. Ipinublikar kaidtong 468 taon na an nakaagi, iyan sana an solamenteng komple-
tong enot na edisyon kan Biblia ni Tyndale na nakalibre sa determinadong mga paghihingoa na raoton iyan. An Bibliang ini iineksibir sa publiko duman sa Londres.
An Biblia ni Tyndale binakal sa Bristol Baptist College sa Inglaterra, kun saen iyan sinaray poon pa kan 1784. Si Dr. Roger Hayden, an bise-tsirman kan komite kan kolehiyo, nagsabi: “Ini sarong nasyonal, kultural asin Kristianong dokumento na igwa nin dakulaon na importansia asin gusto mi na mas dakol an makaheling kaiyan, ta sinaray mi iyan sa kaha de yero.”
Sa laog nin dakol na siglo an Biblia sa kadaklan Latin asin puwede sanang mabasa kan klero asin piling mga edukado. Siring ki John Wycliffe bago saiya, boot ni Tyndale na gumibo nin sarong Biblia na mababasa asin masasabotan nin gabos. Sinabi nia kaidto sa sarong klerigo na nagkontra saiya: ‘Kun totogotan ako nin Dios na mabuhay bago umagi an dakol na taon, pangyayarihon ko na mas dakol an maaraman sa Kasuratan nin sarong aki na nag-aarado kisa sa saimo.’
Ini peligrosong trabaho, huling tinutumang na marhay kan klero an ano man na paghihingoa na gibohon an Kasuratan na puwedeng makua kan ordinaryong mga tawo. Bilang resulta, duminulag si Tyndale sa Inglaterra pasiring sa Alemania. Duman nia trinadusir an “Bagong Tipan” gikan sa orihinal na Griego. Mga 3,000 na kopya an inimprenta asin inismagul pasiring sa Inglaterra. Binakal kan obispo sa Londres an kada kopya na manompongan nia asin sinolo iyan sa publiko sa patyo kan simbahan nin St. Paul. Pag-abot nin panahon, si Tyndale nadakop, binista, asin sinentensiahan na nagkasala nin erehiya. Kan 1536 tinilok asin sinolo sia sa harigi. Abaa kainteresante na an Biblia na ikinaoongis na gayo kan klero dakulaon na an kantidad ngonyan!
Odok sa boot na pinagmamaigotan kan mga Saksi ni Jehova na ipaabot an tamang kaaraman sa Biblia sa gabos na naghahanap kaiyan. Apuwera sa pag-imprenta asin pagwaras nin iba pang mga bersion, nakaprodusir sinda nin sarong traduksion kan bilog na Biblia gikan sa orihinal na mga lenguahe na kapwa eksakto asin madaling basahon. Pag-abot kan 1995 labi na sa 74,000,000 na kopya kaining New World Translation of the Holy Scriptures an ipinublikar sa 12 tataramon. Siyempre, an tunay na halaga kan arin man na Biblia iyo an nagtataong-buhay na mensahe kaiyan.
[Retrato sa pahina 32]
Si William Tyndale
[Pasasalamat para sa pinagkuanan]
Gikan sa daan na inukit sa Bibliothèque Nationale