An Pinakadakulang Tawo na Nabuhay Kasuarin Pa Man
Kapitulo 112: An Ultimong Paskua ni Jesus Harani Na
Mantang madali nang matapos an Martes, Nisan 11, tinatapos ni Jesus an pagtotokdo sa mga apostol sa Bukid nin mga Olibo. Abaa kasibot, nakapapagal na aldaw idto! Ngonyan, tibaad mantang pabalik sa Betania para sa banggi, sinabihan nia an saiyang mga apostol: “Naaaraman nindo na duwang aldaw poon ngonyan mangyayari an paskua, asin an Aki nin tawo itatao tanganing ipako.”
Malinaw na ginamit ni Jesus an suminunod na aldaw, Miyerkoles, Nisan 12, sa matoninong na pagpahingalo kaiba kan saiyang mga apostol. Kan nakaaging aldaw, sinagwe nia sa publiko an mga namomoon sa relihiyon, asin narerealisar nia na naghihingoa sindang gadanon sia. Kaya kan Miyerkoles dai sia nagpaheling, huling habo niang may ano man na makaistorbo sa saiyang pagselebrar kan Paskua kaiba kan saiyang mga apostol sa masunod na banggi.
Mientras tanto, an mga poon na saserdote asin an kamagurangan na lalaki kan banwaan nagtiripon sa patyo kan halangkaw na saserdote, si Caifas. Nakolgan sa pag-atake ni Jesus kan nakaaging aldaw, nagpaplano sinda na dakopon sia paagi sa tusong pakana asin ipagadan sia. Pero padagos sindang nagsasarabi: “Bakong sa kapiyestahan, tanganing mayong lumataw na pagkariribok sa tahaw kan mga tawo.” Natatakot sinda sa mga tawo, na may pag-oyon ki Jesus.
Mantang an mga namomoon sa relihiyon may karatan na nagkakasapakat na gadanon si Jesus, may nag-abot na bisita sa sainda. Sa pagkabigla ninda, saro iyan sa mismong mga apostol ni Jesus, si Judas Iscariote, an saro na tinanoman ni Satanas kan maraot na ideya na pasaloiban an saiyang Kagurangnan! Naogma nanggad sinda kan si Judas maghapot: “Ano an itatao nindo sa sako tanganing pasaloiban ko sia sa saindo?” Naoogma sindang uminoyon na bayadan sia nin 30 pidasong pirak, an kantidad nin sarong oripon sono sa tipan kan Mosaikong Pagboot. Poon kaidto, si Judas naghanap nin marahay na oportunidad na pasaloiban si Jesus sa sainda na mayo nin mga tawong nakapalibot.
An Nisan 13 minapoon sa pagsolnop kan aldaw sa Miyerkoles. Nagdatong si Jesus hale sa Jerico kan Biyernes, kaya ini an ikaanom asin ultimong banggi nia sa Betania. Kan sunod na aldaw, Huwebes, kaipuhan na magibo an ultimong mga pag-andam para sa Paskua, na mapoon pagsolnop kan aldaw. Iyan an panahon na an kordero kan Paskua kaipuhan na bonoon dangan asalon nin bilog. Saen ninda seselebraron an kapiyestahan, asin siisay an magibo kan mga pag-andam?
Dai itinao ni Jesus an siring na mga detalye, posibleng tanganing mapogolan si Judas sa pagtao nin impormasyon sa mga poon na saserdote tanganing madakop ninda si Jesus durante kan pagselebrar kan Paskua. Alagad ngonyan, posibleng amay na hapon nin Huwebes, isinugo ni Jesus si Pedro asin Juan hale sa Betania, na nagsasabi: “Paduman kamo asin andamon nindo an paskua tanganing makakan ta.”
“Saen mo boot na andamon mi iyan?” an hapot ninda.
“Paglaog nindo sa siudad,” an paliwanag ni Jesus, “sarong lalaki na may darang dulay nin tubig an masabat saindo. Sundan nindo sia sagkod sa harong na laogan nia. Asin magsabi kamo sa kagharong, ‘An Paratokdo nagsasabi saimo: “Haen an kuwarto para sa bisita na makakakanan ko kan paskua kaiba kan sakong mga disipulo?”’ Asin ipapaheling saindo kan lalaking iyan an sarong dakulang kuwarto sa itaas na sangkap na. Andamon nindo iyan dian.”
Mayong duwa-duwa na an kagharong sarong disipulo ni Jesus na posibleng inaantisipar an pakiolay ni Jesus na gamiton an saiyang harong para sa espesyal na okasyon na ini. Minsan paano, pagdatong ni Pedro asin Juan sa Jerusalem, nanompongan ninda an gabos siring sa ihinula ni Jesus. Kaya sinierto kan duwa na andam na an kordero asin na nagibo na an gabos na iba pang areglo tanganing maasikaso an mga pangangaipo kan 13 magseselebrar kan Paskua, si Jesus asin an saiyang 12 apostol. Mateo 26:1-5, 14-19; Marcos 14:1, 2, 10-16; Lucas 22:1-13; Exodo 21:32.
▪ Ano an malinaw na ginibo ni Jesus kan Miyerkoles, asin taano?
▪ Anong pagtiripon an ginibo sa harong kan halangkaw na saserdote, asin sa anong katuyohan na sinongko ni Judas an mga namomoon sa relihiyon?
▪ Siisay an sinugo ni Jesus pasiring sa Jerusalem kan Huwebes, asin sa anong katuyohan?
▪ Ano an nanompongan kan mga sinugong ini na naghayag giraray kan milagrosong mga kapangyarihan ni Jesus?