An Pinakadakulang Tawo na Nabuhay Kasuarin Pa Man

Kapitulo 114: An Pamanggihan na Memorial

Pakahanawe ni Jesus kan mga bitis kan saiyang mga apostol, kinotar nia an teksto sa Salmo 41:​9, na nagsasabi: “An dating nagkakakan sa sakong tinapay nag-iitaas kan saiyang bool tumang sa sako.” Dangan, nariribok na sa espiritu, sia nagpaliwanag: “An saro sa saindo mapasaloib sa sako.”

An mga apostol nagpoon na magmondo asin pasarosarong nagsabi ki Jesus: “Bako ako iyan, bako daw?” Pati si Judas Iscariote nakibale sa paghapot. Si Juan na naghihigda sa kataed ni Jesus sa lamesa, suminandig sa daghan ni Jesus asin naghapot: “Kagurangnan, siisay?”

“Saro sa kagduwa, na minasawsaw kadungan ko sa pankagabsan na mangko,” an simbag ni Jesus. “Totoo, an Aki nin tawo mahale, siring nanggad sa nasusurat mapadapit sa saiya, alagad herak man sa tawong iyan na paagi sa saiya an Aki nin tawo pinasaloiban! Mas marahay pa kutana sa tawong iyan kun dai sia namundag.” Pakatapos kaiyan, si Satanas luminaog giraray ki Judas, na inaaprobetsaran an nabuksan na agihan sa saiyang puso, na nagin maraot. Kan huri kan bangging idto, angay na inapod ni Jesus si Judas na “aki nin kalaglagan.”

Sinabihan ngonyan ni Jesus si Judas: “An ginigibo mo taposon mo na tolos.” Mayo sa ibang apostol na nakaintindi kan boot sabihon ni Jesus. An iba naghona na huling si Judas an nagkakapot kan kahon nin kuwarta, si Jesus nagsasabi saiya: “Bumakal ka kan mga bagay na kaipuhan ta para sa kapiyestahan,” o na sia maninigong magduman asin magtao sa mga dukha.

Pakahale ni Judas, iinintrodusir ni Jesus an sarong biyong bagong selebrasyon, o paggirumdom, kaiba kan saiyang maimbod na mga apostol. Nagkua sia nin tinapay, namibi nin pasasalamat, binaraak iyan, asin itinao iyan sa sainda, na sinasabi: “Kua, kakan kamo.” Nagpaliwanag sia: “Ini nangangahulogan kan sakong hawak na itatao para sa saindo. Padagos na gibohon nindo ini sa paggirumdom sa sako.”

Kan an lambang saro makakakan kan tinapay, si Jesus nagkua nin sarong kopa nin arak, na malinaw na iyo an ikaapat na kopang ginamit sa seremonya sa Paskua. Pinamibian man nia iyan nin pasasalamat, iinabot iyan sa sainda, pinainom sinda dian, asin nagsabi: “An kopang ini nangangahulogan kan bagong tipan paagi sa sakong dugo, na papabuloson para sa saindo.”

Kaya ini, sa katunayan, sarong memorial kan kagadanan ni Jesus. Kada taon sa Nisan 14 iyan dapat na otrohon, siring kan sabi ni Jesus, sa paggirumdom sa saiya. Ipapagirumdom kaiyan sa mga nagseselebrar an ginibo ni Jesus asin kan saiyang langitnon na Ama sa pagkalda sa katawohan hale sa pagkondenar sa kagadanan. Para sa mga Judio na nagin mga parasunod ni Cristo, an selebrasyon masalida sa Paskua.

An bagong tipan, an pinagin balido kan pinabulos na dugo ni Jesus, suminalida sa daan na tipan nin Pagboot. Si Jesus an nangoltanan dian sa tahaw nin duwang lado​—sa sarong kampi, si Jehova Dios, asin sa ibong na kampi, an 144,000 na pinaniaki sa espiritung mga Kristiano. Apuwera sa pagtao nin kapatawadan sa mga kasalan, an tipan nagpapangyari sa pagbilog nin sarong langitnon na nasyon nin mga hade-saserdote. Mateo 26:​21-29; Marcos 14:​18-25; Lucas 22:​19-23; Juan 13:​18-30; 17:12; 1 Corinto 5:7.

▪ Anong hula sa Biblia an kinotar ni Jesus mapadapit sa sarong kaiba, asin ano an pag-aplikar nia kaiyan?

▪ Taano an mga apostol ta namondong marhay, asin ano an ihinapot kan lambang saro sa sainda?

▪ Ano an ipinapagibo ni Jesus ki Judas, alagad ano an pakaintindi kan ibang apostol sa mga pagboot na ini?

▪ Anong selebrasyon an iinintrodusir ni Jesus pakahale ni Judas, asin sa anong katuyohan iyan nagseserbi?

▪ Sairisay an mga kalabot sa bagong tipan, asin ano an nagibo kan tipan?