“Magayagayang mga Paraomaw” na Kombension​—Maduman daw Kamo?

KAGAYAGAYAHAN! An termino daw na iyan bago, bako nganing makahulogan, sa panahon na ini na pano nin kariribokan? Sierto nanggad na an mga diaryo dai nagtatao nin dakol na dahelan para sa kagayagayahan. An etnikong ralaban, lakop na marhay na gutom, kadaihan nin trabaho, peligrosong polusyon, kadaihan nin kasegurohan sa politika, krimen​—an mga ini bakong bagay na makapapano nin kagayagayahan sa puso, bako daw?

An kadaklan na tawo ngonyan inaaprobetsaran an ano man na kaalingan na puede nindang makua sa buhay. Alagad an kagayagayahan? An kagayagayahan ilinaladawan na “kamugtakan na may kaogmahan; pag-ogma.” Bakong kadakol kan nakaeksperyensia nin tunay na kagayagayahan, asin kun iyo, iyan parateng temporaryo sanang marhay.

Pero, sa pagtanaw sa satong kaaldawan, an Biblia naghula: ‘Ini an isinabi kan Soberanong Kagurangnan na Jehova: “Uya! An sakong mga lingkod maggagayagaya. Uya! An sakong mga lingkod magkukururahaw sa kagayagayahan huli sa marahay na kamugtakan kan puso.”’ (Isaias 65:​13, 14) Paano iyan mangyayari?

Tanganing makua an simbag, iniimbitaran niamo kamo na umatender sa saro kan pandistritong mga kombension kan Mga Saksi ni Jehova na gigibohon ngonyan na 1995. “Magayagayang mga Paraomaw” an tema kan mga kombension, asin daing bayad an pag-atender. Kabale sa programa kan tolong aldaw na kombension an basado sa Bibliang mga pahayag, demonstrasyon, pag-orolay, asin dakol pa. Sa bilog na programa, itatampok an temang kagayagayahan.

An seryeng ini nin mga kombension nagpoon sa Estados Unidos kan Hunyo asin magpapadagos sa mga siudad sa bilog na kinaban sagkod sa pagpoon kan 1996. Posible na magkakaigwa nin saro na harani sa saindo. Taano ta dai maghapot sa Mga Saksi ni Jehova na nag-iistar sa saindong lugar? Maogma niamo kamong iniimbitaran na magduman.