An Pinakadakulang Tawo na Nabuhay Kasuarin Pa Man

Kapitulo 130: Sa Dagat nin Galilea

An mga apostol nagbaralik na ngonyan sa Galilea, siring kan naenot nang ipinagboot ni Jesus na gibohon ninda. Alagad dai ninda sierto kun ano an maninigo nindang gibohon duman. Paghaloyhaloy, sinabihan ni Pedro si Tomas, Natanael, Santiago asin an saiyang tugang na si Juan, asin an duwa pang apostol: “Maninira ako.”

“Maiba man kami sa saimo,” an simbag kan anom.

Durante kan magdamlag na idto, dai sindang ano man na nadakop. Minsan siring, kan nagliliwanag na, si Jesus nagtunga sa may gilid nin dagat, alagad dai namamansayan kan mga apostol na sia si Jesus. Sia nagkurahaw: “Mga aki, mayo kamo nin makakakan, ano?”

“Mayo!” an simbag ninda sa ibong kan katubigan.

“Taktakan nindo an hikot sa too kan sakayan asin may makukua kamo,” an sabi nia. Asin kan gibohon ninda iyan, dai ninda nahimong botongon an saindang mga hikot huli kan gabos na sira.

“An Kagurangnan ini!” an kurahaw ni Juan.

Kan madangog ini, ihinagkos ni Pedro an saiyang pan-ibabaw na gubing, huli ta hinuba nia an saiyang bado, asin tuminagbang sa dagat. Dangan luminangoy sia nin mga nobenta metros pasiring sa baybayon. Nagsunod an ibang apostol lunad sa sadit na sakayan, na ginuguyod an hikot na pano nin sira.

Pag-abot ninda sa baybayon, igwa nin nagbabagang uring, na igwang nakabugtak na sira, asin igwa nin tinapay. “Daraha nindo an nagkapirang sira na nadakop pa sana nindo ngonyan,” an sabi ni Jesus. Suminakay si Pedro asin ginuyod pagilid an hikot. Igwa iyan nin 153 na darakulang sira!

“Madia, pamahaw na kamo,” an pag-agda ni Jesus.

Mayo ni saro sa sainda na nagkosog nin boot na maghapot, “Siisay ka?” huli ta gabos sinda nakakaaram na sia si Jesus. Ini an saiyang ikapitong pagpaheling pakatapos na mabuhay liwat, asin an saiyang ikatolo sa mga apostol bilang grupo. Nagpuwesto sia ngonyan nin pamahawan, na tinatawan nin tinapay asin sira an kada saro sa sainda.

Pakakakan ninda, si Jesus, na posibleng nagheheling sa dakolon na sirang nadakop, hinapot si Pedro: “Simon na aki ni Juan, namomoot ka sa sako nin orog kisa mga ini?” Mayong duwa-duwa na an boot niang sabihon, Mas namomoot ka daw sa negosyo nin paninira kisa sa gibohon na para kaiyan inandam taka?

“Ika nakakaisi na ako namomoot sa saimo,” an simbag ni Pedro.

“Pasabsaba an sakong mga kordero,” an simbag ni Jesus.

Sa giraray, sa ikaduwang beses, sia naghapot: “Simon na aki ni Juan, namomoot ka sa sako?”

“Iyo, Kagurangnan, ika nakakaisi na ako namomoot sa saimo,” an odok na simbag ni Pedro.

“Pastoran mo an saradit kong karnero,” an ipinagboot giraray ni Jesus.

Dangan, sa ikatolo pang beses, sia naghapot: “Simon na aki ni Juan, igwa ka nin pagkamoot sa sako?”

Sa ngonyan namomondo na si Pedro. Puwedeng iniisip-isip nia kun baga pinagdududahan ni Jesus an saiyang kaimbodan. Total, kan dai pa sana nahahaloy na binibista si Jesus para sa saiyang buhay, si Pedro tolong beses na nagpaindang midbid nia sia. Kaya si Pedro nagsabi: “Kagurangnan, ika nakakaisi kan gabos na bagay; ika nakakaisi na ako namomoot saimo.”

“Pasabsaba an saradit kong karnero,” an ipinagboot ni Jesus sa ikatolong beses.

Kaya ginamit ni Jesus si Pedro bilang padatolan tanganing idoon sa iba an gibohon na boot niang ipagibo sainda. Sa dai na mahahaloy mahale sia sa daga, asin boot nia na mangenot sinda sa paglilingkod sa mga dadagkahon pasiring sa toril nin mga karnero nin Dios.

Kun paanong si Jesus ginapos asin ginadan huli ta ginibo nia an gibohon na isinugo nin Dios na gibohon nia, siring man, ihinahayag nia ngonyan, si Pedro maagi nin kaparehong eksperyensia. “Kan ika aki pa,” an sabi sa saiya ni Jesus, “naghahagkos ka kan saimong sadiri asin naglilibot kun saen an boot mo. Alagad kun ika gumurang na uunaton mo an saimong mga kamot asin ibang tawo an maghahagkos sa saimo asin dadarahon ka kun saen habo mo.” Sa ibong kan kagadanan bilang martir na naghahalat ki Pedro, sinadol sia ni Jesus: “Padagos na sumunod ka sa sako.”

Pagbirik, naheling ni Pedro si Juan asin naghapot: “Kagurangnan, ano an gigibohon kan tawong ini?”

“Kun kabotan ko para sa saiya na magdanay sagkod na ako dumatong,” an simbag ni Jesus, “anong labot mo kaiyan? Padagos na sumunod ka sa sako.” An mga tataramon na ini ni Jesus sinabot nin dakol sa saiyang mga disipulo na nangangahulogan na si apostol Juan dai noarin man magagadan. Minsan siring, arog kan sa huri ipinaliwanag ni apostol Juan, si Jesus dai nagsabi na sia dai magagadan, kundi an sabi sana ni Jesus: “Kun kabotan ko para sa saiya na magdanay sagkod na ako dumatong, anong labot mo kaiyan?”

Kan huri ginibo man ni Juan an makahulogan na komentong ini: “Igwa pa, sa katunayan, nin dakol na ibang bagay na ginibo man ni Jesus, na kun iyan isurat sa kabilogan, paghona ko sana, minsan an kinaban dai magkakaigo na bugtakan kan mga balumbon na isinurat.” Juan 21:​1-25; Mateo 26:​32; 28:​7, 10.

▪ Ano an nagpapaheling na dai sierto kan mga apostol an maninigo nindang gibohon sa Galilea?

▪ Paano namidbid kan mga apostol si Jesus sa Dagat nin Galilea?

▪ Pirang beses nang nagpaheling ngonyan si Jesus poon kan saiyang pagkabuhay liwat?

▪ Paano idinoon ni Jesus an boot niang gibohon kan mga apostol?

▪ Paano ipinarisa ni Jesus kun paano magagadan si Pedro?

▪ Anong mga komento ni Jesus manongod ki Juan an nasala sa pagsabot an dakol sa mga disipulo?

(Ipagpapadagos sa masunod na luwas.)