Mga Babae sa Palibot kan Globo

KAN an enot na mag-agom nagrebelde tumang sa Dios, si Jehova naghula nin makalamidad na mga epekto na mangyayari kapwa sa sainda asin sa saindang mga gikan. Si Jehova nagsabi ki Eva: “An saimong pagmawot magigin para sa saimong agom, asin sia madominar sa saimo.” (Genesis 3:16) An Biblia danay na minadagka sa hararom na paggalang para sa mga babae, asin minilyon na babae an may mas maogma, mas nakakokontentong buhay huli ta sinda asin an saindang mga pamilya nag-aaplikar kan mga prinsipyo sa Biblia.

Alagad sono sa sarong dai pa sana nahahaloy na report manongod sa sa-tawong diretso, dakol na ibang babae sa bilog na kinaban an sinosopog, inaaprobetsaran, asin hinahalean nin onra. Nagkokomento sa report, an International Herald Tribune nagpapahayag: “Detalyadong marhay, an report dapit sa 193 na nasyon . . . nagpapaheling nin makamomondong kamugtakan nin pan-aroaldaw na diskriminasyon asin pan-aabuso.”

Uya an nagkapirang halimbawa: Sa sentral na Aprika, an mga aking babae an naggigibo sa kadaklan kan magagabat na trabaho sa pag-oma, asin an nag-eereskuela sa sainda un-tersio sana kan bilang nin nag-eereskuelang aking lalaki. Sa sarong nasyon duman, an pagsambay ilegal para sa mga babae alagad bako para sa mga lalaki. An ley sa saro pang Aprikanong nasyon inaabsuelto an agom na lalaki na nakagadan sa saiyang agom na babae kun an babae madakop sa akto nin pagsambay, alagad an ley dai inaabsuelto an agom na babae na nakagadan sa saiyang agom na lalaki sa kaparehong kamugtakan.

An report nagsasabi na sa mga parte nin Amerika del Sur, an pulisiya mayong simpatiya sa linalanog na mga agom na babae. Asin an nagtatrabahong mga babae parateng dapat na manigoan na sa sueldong mas hababa nin 30 sagkod 40 porsiento kisa sa mga lalaki.

Sa mga parte nin Asia, an mga babae biktima nin pirit na mga esterilisasyon o aborsion. Sa sarong nasyon, igwa nin minaabot sa 500,000 na mga patotot, na dakol sainda an ipinabakal digdi nin mga magurang na naghahanap nin kuartang ikadudugang sa pambakal nin bagong harong para sa saindang sadiri. An pulisiya sa saro pang nasyon dapat na gumibo nin aksion mapadapit sa lakop na “mga kagadanan sa dote”​—an agom na babae ginagadan kan saiyang agom na lalaki o kan pamilya kaini huli ta an saiyang dote dai nakaabot sa linalaoman.

Mapadapit ki Jesu-Cristo, an Biblia nagseseguro sa sato: “Ililigtas nia an dukha na naghahagad nin tabang, siring man an nagsasakit asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalaga sa saiyang mga mata.” (Salmo 72:​12-14) Kaya igwa kita nin dahelan na magin optimistiko; an mga babae sa bilog na kinaban puedeng maglaom sa pinakarhay na mga kamugtakan na maeksister sa panahon na iyan.