Mga Hapot Hale sa mga Parabasa

An Dios daw nagin may pagpapalaen sa pagpili para sa enot na namamahalang grupo nin mga lalaking parareho an pinaghalean na rasa asin nasyon​—ta gabos sinda Judio?

Dai, dai nanggad. Gabos kaidtong enot na mga inapod ni Jesus bilang saiyang mga disipulo Judio. Dangan, kan Pentecostes 33 C.E., an mga Judio asin Judiong mga proselito an enot na linahidan nin banal na espiritu asin sa siring nakualipikar na maghade kaiba ni Cristo sa langit. Kan huri na sana na iiniba an mga Samaritano asin dai tinuring mga Hentil na nakombertir. Kaya, masasabotan na an namamahalang grupo sa peryodong iyan binilog nin mga Judio, “mga apostol asin kamagurangan na lalaki sa Jerusalem,” arog kan sinambit sa Gibo 15:2. Mga lalaki ini na nagkaigwa nin mas hararom na pakasabot sa Makakasuratan na kaaraman asin mga taon nin eksperyensia sa tunay na pagsamba, asin sinda nagkaigwa na nin mas dakol na panahon na umoswag sa pagigin maygurang na Kristianong kamagurangan.​—Ikomparar an Roma 3:​1, 2.

Sa panahon kan pagtiripon kan namamahalang grupo na isinaysay sa Gibo kapitulo 15, dakol nang Hentil an nagin Kristiano. Kabale sa mga ini an mga taga-Aprika, taga-Europa, asin mga tawo hale sa ibang mga rehion. Pero, mayong rekord na an siisay man sa mga Hentil na iyan idinagdag sa namamahalang grupo tanganing gibohon na nakaeengganyo an Kristianismo sa mga bakong Judio. Mantang an nakokombertir pa sanang Kristianong mga Hentil na ini kapantay na mga miembro sa “Israel nin Dios,” siertong iginalang ninda an pagkamaygurang asin orog na eksperyensia kan Kristianong mga Judio, siring baga kan mga apostol, na mga kabtang kan namamahalang grupo kaidto. (Galacia 6:16) Mangnoha sa Gibo 1:​21, 22 kun gurano kahalangkaw kan pagpahalaga sa siring na eksperyensia.​—Hebreo 2:3; 2 Pedro 1:18; 1 Juan 1:​1-3.

Sa dakol na siglo trinatar nin Dios sa espesyal na paagi an nasyon nin Israel, na hale dian pinili ni Jesus an saiyang mga apostol. Bakong sala o inhustisya na mayo nin mga apostol na gikan sa nagin ngonyan Amerika del Sur o Aprika o Harayong Sirangan. Pag-abot nin panahon an mga lalaki asin babae hale sa mga lugar na iyan magkakaigwa nin oportunidad na magkamit nin mga pribilehiong orog nanggad na dakula kisa sa pagigin sarong apostol sa daga, pagigin sarong miembro kan namamahalang grupo kan enot na siglo, o pagkaigwa nin arin man na iba pang asignasyon sa laog kan banwaan nin Dios ngonyan.​—Galacia 3:​27-29.

Sarong apostol an napahirong magpahayag na “an Dios dai nagpapalaen, kundi sa lambang nasyon an tawo na natatakot sa saiya asin naggigibo nin katanosan saiyang inaako.” (Gibo 10:​34, 35) Iyo, bukas sa gabos an mga pakinabang sa pantubos ni Cristo, na mayo nin pagpalaenlaen. Asin an mga indibiduwal hale sa lambang tribo asin tataramon asin nasyon iiiba sa langitnon na Kahadean asin sa dakulang kadaklan na mabubuhay sagkod lamang sa daga.

Dakol na tawo an nagigin sensitibo manongod sa mga pinaghalean na rasa, tataramon, o nasyon. Ilinaladawan ini kan satong mababasa sa Gibo 6:1 mapadapit sa sarong isyu na nagcausa nin paggurumodgumod sa pag-oltanan nin mga Kristianong nagtataram nin Griego asin idtong mga nagtataram nin Hebreo. Tibaad kita nagdakula na igwa nin o nagkaigwa kan presenteng mga pagkasensitibo manongod sa tataramon, rasa, etnikong pinaghalean, o henero. Huli sa posibilidad na iyan na totoong gayo, marahay na pagmaigotan na gayo niato na togotan an satong mga saboot asin reaksion na mamolde kan pagmansay nin Dios, na an gabos na tawo parantay sa atubangan nia, minsan ano an satong panluwas na itsura. Kan iparekord nin Dios an mga kualipikasyon para sa kamagurangan asin ministeryal na mga lingkod, dai sia nagsambit nin rasa asin pinaghalean na nasyon. Dai, nagkonsentrar sia sa espirituwal na mga kualipikasyon kaidtong puedeng magin andam na maglingkod. Totoo iyan ngonyan sa lokal na kamagurangan, nagbibiyaheng mga paraataman, asin mga tawohan sa sanga, kun paanong totoo iyan sa namamahalang grupo kan enot na siglo.