Sarong Leksion Gikan sa mga Gamgam Asin Burak

ANO an parateng pinaghahaditan nin mga tawo ngonyan nin orog kisa sa ano pa man? Para sa mayoriya, iyan an pagkaigwa nin bastanteng ikasusustento sa saindang pamilya o pakapakarhay kan saindang kamugtakan sa buhay.

An pakakua sa mga pangangaipo saro man na mayor na pinaghahaditan kan si Jesu-Cristo yaon digdi sa daga. Alagad nagpatanid sia na an lehitimong paghadit na ini puedeng magin nakadodominar na kahaditan na ikinawawara nin espirituwal na mga bagay. Tanganing iilustrar an saiyang punto, sinabihan ni Jesus an saiyang mga disipulo na masdan na marhay an mga gamgam asin burak.

An mga gamgam kaipuhan na kumakan aroaldaw​—na mas dakol nanggad kisa sa kinakakan niato huli sa saindang marikas na metabolismo. Saro pa, dai ninda kayang magsabwag nin banhi, mag-ani, o magtipon nin kakanon para sa ngapit. Pero, siring kan komento ni Jesus, “pinakakakan sinda kan [satong] langitnon na Ama.” (Mateo 6:26) Siring man, ginugubingan nin Dios nin pinakamarahay na klase an magagayon na “liryo sa oma.”​—Mateo 6:​28-30.

Inaasegurar kita ni Jesus na kun an materyal na mga pangangaipo papagdadanayon niato sa tamang pagmansay asin ipaoorog an espirituwal na mga bagay, sisiertohon nin Dios na igwa man kita kan kinakaipuhan na kakanon asin gubing. Kun inaataman ni Jehova Dios an mga gamgam asin burak, sierto nanggad na aatamanon nia an mga namomoot sa saiya asin ‘padagos na naghahanap nguna kan kahadean asin kan saiyang katanosan.’ (Mateo 6:33) Ineenot daw nindo sa saindong buhay an intereses kan Kahadean nin Dios?