Sambahon si Jehova na Malinig an mga Kamot

NASA irarom nin pasabong, an salmistang si David nag-awit: “Hahanawan ko an sakong mga kamot sa dai pagkakasala mismo, asin maglalakaw ako sa palibot kan saimong altar, O Jehova.”​—Salmo 26:6.

Sa pagsurat kan mga tataramon na ini, puedeng indirektang pinanonongdan ni David an kaugalean kan mga saserdoteng Levita sa Israel na pagsakat sa rampa kan altar dangan pagbugtak kan saindang atang sa kalayo. Alagad antes na gibohon an akto nin pagsambang ini, hinahagad sa mga saserdote na maghanaw kan saindang mga kamot asin bitis. Ini bakong sadit na detalye. An dai paggibo kan enot na aksion na ini puedeng ikagadan nin sarong saserdote!​—Exodo 30:​18-21.

An piguratibong paghanaw nagbubunga nin espirituwal asin moral na kalinigan. (Isaias 1:16; Efeso 5:​26) Gusto ni Jehova na kita ‘maglakaw sa palibot kan saiyang altar’ ngonyan paagi sa paglingkod sa saiya. Alagad hinahagad nia na gibohon ta ini na malinig an mga kamot​—siring sa pagkasabi ni David, mga kamot na hinanawan “sa dai pagkakasala mismo.” Ini bakong suba-subang kahagadan, huli ta idtong mga naggigibo nin karompotan dai magmamana kan Kahadean nin Dios. (Galacia 5:​19-21) An pamumuhay sa diosnon na mga gibo dai nagtatao sa saro nin lisensia na mapalabot sa inmoral na paggawe. Sa siring nagsurat si apostol Pablo: “Linalanog ko an sakong hawak asin inooripon iyan, tanganing, pakatapos na ako makapaghulit sa iba, ako mismo dai isikwal minsan sa ano man na paagi.”​—1 Corinto 9:27.

Idtong mga naghahanap kan pag-oyon nin Dios asin nin tunay na kaogmahan dapat na maglingkod ki Jehova na malinig an mga kamot. Arog ni David, sinda naglalakaw “na may integridad sa puso asin katanosan.”​—1 Hade 9:4.