Pasirangon Nindo an Saindong Liwanag!
SA KATAPUSTAPUSI uminabot na an panahon na maheling kan maedad nang lalaki an ipinanugang Mesiyas! Paagi sa kapahayagan nin Dios aram ni Simeon na “dai sia makakaheling nin kagadanan sagkod na saiyang maheling an Cristo ni Jehova.” (Lucas 2:26) Alagad kanigoan kanakapupukaw sa boot kan si Simeon luminaog sa templo asin si Maria asin Jose ilaag an omboy na si Jesus sa saiyang mga takyag! Inomaw nia an Dios, na sinasabi: “Ngonyan, Soberanong Kagurangnan, pinahahale mong talingkas an saimong oripon sa katoninongan . . . huli ta naheheling kan sakong mga mata an saimong paagi nin pagligtas . . . sarong liwanag sa paghale kan suklob sa mga nasyon asin sarong kamurawayan kan saimong banwaan na Israel.”—Lucas 2:27-32; ikomparar an Isaias 42:1-6.
Si Jesus, poon na sia bautismohan sa edad na 30 sagkod sa saiyang kagadanan, napatunayan na sarong “liwanag” sa kinaban. Sa anong mga paagi? Sia nagpasirang nin espirituwal na liwanag paagi sa paghuhulit manongod sa Kahadean nin Dios asin sa Saiyang mga katuyohan. Ibinuyagyag man nia an falsong relihiosong mga katokdoan asin malinaw na ipinamidbid an mga gibo kan kadikloman. (Mateo 15:3-9; Galacia 5:19-21) Kun siring, tama sanang makapagsabi si Jesus: “Ako iyo an liwanag kan kinaban.”—Juan 8:12.
Si Jesus nagadan kan taon 33 C.E. Naparong na daw kaidto an liwanag? Dai nanggad! Kan nasa daga pa, sinabihan ni Jesus an saiyang mga disipulo: “Pasiranga an saindong liwanag sa atubangan nin mga tawo.” (Mateo 5:16) Huli kaiyan, pakatapos na magadan si Jesus pinapagdanay kan saiyang mga parasunod na sumirang an liwanag.
Sa pag-arog ki Jesus, pinasisirang kan mga Kristiano ngonyan an liwanag ni Jehova paagi sa pakikakabtang sa paghuhulit. Sinda ‘padagos na naglalakaw bilang mga aki nin liwanag,’ na nagigin maliwanag na mga halimbawa sa Kristianong pamumuhay.—Efeso 5:8.