An Pagtubod Nagpahiro sa Saiya
KAN si Moises sugoon ni Jehova na pangenotan an nasyon nin Israel paluwas sa kaoripnan sa Egipto, si Moises sa primero naghagad nin dispensasyon, na nagsasabi: “Dispensara ako, Jehova, alagad ta bako akong matibay magtaram, poon man kasuodma ni poon kan bago kaiyan ni poon kan saimong pakipag-olay sa saimong lingkod, huli ta ako maluway sa ngoso asin maluway sa dila.” (Exodo 4:10) Iyo, si Moises dai nagsaboot na sia kualipikado sa siring na magabat na asignasyon.
Iyo man ngonyan, dakol sa lingkod ni Jehova an kun minsan nagsasaboot na bakong angay sa pag-otob kan mga paninimbagan na iinasignar sa sainda. Halimbawa, an sarong Kristianong paraataman na an ngaran Theodore nagsaysay: “Sa gabos na bagay na hinahagad ni Jehova na gibohon ko, an ministeryo sa langtad an pinakamasakit. Kan ako hoben pa, marikas akong minadolok sa pinto, sagin dinodoonan an doorbell, asin toninong na minalakaw parayo, na naglalaom na mayong makadangog o makaheling sa sako. Kan ako nagkakaedad na, dai ko na ginigibo iyan, alagad an pag-imahinar na ako madolok sa kada pinto nakakapahelang sa sako sa pisikal. Dawa ngonyan, napapasuka ako bago lumuwas sa ministeryo, alagad ako minaiba pa man giraray.”
Ano an nagpangyari ki Moises asin sa modernong aldaw na mga Saksi arog ni Theodore na makapanggana sa siring na mga pagkatakot? An Biblia minasimbag: “Huli sa pagtubod sia [si Moises] naghale sa Egipto, . . . huli ta sia nagpadagos na marigon na garo baga nakaheheling kan Saro na dai naheheling.”—Hebreo 11:27.
Tunay nanggad, paagi sa paggibo nin pagtubod ki Jehova, si Moises nakapanggana sa saiyang mga saboot nin pagkabakong angay asin naotob an itinao sa saiyang mga paninimbagan bilang hokom, propeta, nangengenot sa nasyon, parapangoltanan kan tipan nin Pagboot, komandante, historyador, asin parasurat kan Biblia.
Sa kaparehong paagi, kun igwa kita nin pagtubod na arog ki Moises, kita maglalakaw na garo baga ‘nakaheheling kan Saro na dai naheheling.’ An siring na pagtubod nakaiinspirar nin kapusoan, na nagpapangyari sa sato na isaabaga an satong Kristianong mga paninimbagan—dawa kun kita tibaad nagsasaboot na bakong angay.