“Dai Ako Nangangatorogan, Ano?”
An minasunod na bareta hale sa Malawi mapadapit sa saro kan makasaysayan na “Magayagayang mga Paraomaw” na Pandistritong mga Kombension kan Mga Saksi ni Jehova na ginibo duman kaidtong tig-init nin 1995.
“SA GILID nin sarong dakulang tinampo, mga nasa kabangaan kan baybayon sa solnopan kan Danaw nin Malawi, sa kaenot-enote sa laog nin 29 taon may nakalaag na karatula. Iyan nagsasabi, ‘Pandistritong Kombension kan Mga Saksi ni Jehova.’
“May dakulang trak na napaparada sa kataed kan karatula, asin sa likod kaiyan nagluwas an labing 200 na delegado hale sa banwaan nin Mzuzu. Nagdara sinda nin pinatos na mga gubing, tamong, lutuan, balde, kakanon, songo, asin Biblia tanganing umiba sa mga 3,000 kan saindang mga tugang na lalaki asin babae hale sa ibang lugar.
“Mantang sinasabat niamo an mga tugang sa paglusad sa trak, nag-abot si George Chikako, 63 anyos, na itinutulod an saiyang bisikleta sa baybay, na duwang aldaw na nagbisikleta hale sa Nkhotakota. Sa nag-aging mga taon, si Tugang na Chikako apat na beses na nabilanggo bilang resulta kan saiyang pagsayuma na ikompromiso an mga prinsipyo sa Biblia. An saiyang pinsan nagadan huli sa mga paghampak sa saiya mantang nasa bilanggoan. ‘Dai ako nangangatorogan, ano?’ an hapot ni Tugang na Chikako. ‘An kombension na ini ginigibo sa liwanag nin aldaw, asin an mga tawong ini makosog na nagkakanta kan mga awit na pan-Kahadean! Sa dakol na taon, kinaipuhan na kita magtiripon sa kadikloman nin banggi, ihinghing an mga awit na pan-Kahadean, asin pinagkikiskis an satong mga palad sa pag-upak. Ngonyan kita nagtitiripon nin hayag, asin napapangalas an mga tawo na maheling na kadakol niato mantang an paghona ninda pipira sana kita!’
“An lugar kan kombension nakukudalan nin talahib asin naaatopan nin mga gaho tanganing may limpoy. May itinogdok na saradit na payag-payag na talahib asin bukas sanang mga dormitoryo na istaran kan mga delegado. An aire pagkabanggi pano kan tanog nin magayonon an tonong mga boses na dai na napaluluway nin takot sa paglamag.
“Abaa kaangay na an tema kan kombension ‘Magayagayang mga Paraomaw’!”
[Pasasalamat para sa pinagkuanan]
Mountain High Maps® Copyright © 1995 Digital Wisdom, Inc.