Pagbisita sa Dagang Panuga
IPAMUGTAK ta na sinabihan kamo nin sarong katood na ibinakal nia kamo—bilang sarong regalo—nin bagong harong sa magayon, toninong na lugar. ‘Ano daw an itsura kaiyan?’ an iisipon nindo. Sierto na magigin kamong galaga na maheling mismo nindo an harong na ini, mapasyaran asin helingon an kada kuarto. Total, ini an bago nindong istaran!
Kan 1473 B.C.E., ipinamana ni Jehova sa nasyon nin suanoy na Israel an bagong istaran—an Dagang Panuga, sarong lugar na may sokol na mga 500 kilometros poon sa amihanan sagkod sa timog asin 55 kilometros an lakbang, sa promedyo.a Namumugtak sa inapod na Fertile Crescent, an Dagang Panuga makawiwiling lugar na pag-istaran, na pinaoswag an kualidad kan sadiring napapalaen na mga karakteristiko kaiyan.
Alagad taano ta maninigo kamong magin interesado ngonyan sa sarong “istaran” na itinao sa iba, nangorogna sa saro na haloyon nang nabuhay? Huli ta an kaaraman sa makasaysayan na dagang ini makapaooswag sa saindong apresasyon sa mga tala sa Biblia. “Sa daga kan Biblia,” an isinurat kan gadan nang si Propesor Yohanan Aharoni, “an geograpiya asin historya magkakonektar na marhay na arin man sa duwa dai lubos na masasabotan kun mayo kan tabang kan saro.” Dugang pa, sa pinakaprogresibong panahon kaiyan an Dagang Panuga nagtao nin sadit na halimbawa kan madali nang magin kahulogan para sa katawohan kan Paraiso sa irarom kan Kahadean nin Dios sa bilog na daga!—Isaias 11:9.
Kaidtong ministeryo nia digdi sa daga, ginamit ni Jesu-Cristo an ordinaryong mga eksena sa Dagang Panuga sa pagtokdo nin praktikal na mga leksion. (Mateo 13:24-32; 25:31-46; Lucas 13:6-9) Dakol man kitang manonodan sa praktikal na paagi sa paghorophorop sa nagkapirang prominenteng karakteristiko kan suanoy na Palestina. Pasyaran niato an nagkapira sa mga kuarto kaiyan, sabi ngani, na hineheling an nagkapira sa napapalaen na mga karakteristiko kan dagang ini na nagin istaran kan banwaan nin Dios sa laog nin dakol na siglo. Arog kan maheheling niato, kadakol tang manonodan sa Dagang Panuga.
[Nota sa Ibaba]
a An paggamit kan “Dagang Panuga” sa mga artikulong ini sa punto-de-vista kaidtong suanoy na mga panahon, na iinaatubang sa Biblia, asin daing labot sa modernong politikal/relihiosong mga paghihingako sa rehion.
[Pasasalamat para sa pinagkuanan kan retrato sa pahina 2]
Cover: Pictorial Archive (Near Eastern History) Est.
[Pasasalamat para sa pinagkuanan kan retrato sa pahina 3]
Garo Nalbandian