Kinokonsiderar kan mga Espesyalista an mga Pansalida sa Dugo

MGA 200 na espesyalista hale sa bilog na Estados Unidos an nagtiripon sa Cleveland, Ohio, kan Sabado, Oktubre 7, 1995, tanganing pag-olayan an sarong tema na nag-oorog na pinagkakainteresan sa langtad nin medisina: an pagbolong asin pag-operar na dai naggagamit nin dugo.

Nagkapirang depisil na mga kamugtakan an pinag-olayan. Halimbawa, ano kun an pasyente igwa nin grabeng anemia? Paano an sarong omboy na namundag na kulang pang marhay sa panahon puedeng bolongon na mayo nin dugo? Magigin mapanggana daw an operasyon sa puso na dai nag-iineksion nin dugo? Interesante nanggad, an pag-operar na dai naggagamit nin dugo​—na sa parate naggagamit nin mga paagi na nakatatabang sa hawak na magpaluwas nin sadiring suplay nin dugo—​iinaplikar na sa gabos na situwasyon na ini na marahay an mga resulta.a

Taano ta may pangangaipo nin mga pansalida sa pag-ineksion nin dugo? “Naaraman mi na an mga pag-ineksion nin dugo parateng nag-oolakit nin mga helang, nangorogna an paggatok kan katoy,” sabi ni Sharon Vernon, direktor kan Center for Bloodless Medicine and Surgery sa St. Vincent Charity Hospital sa Cleveland. Sia nagpapadagos: “Dawa kun an dugo dai nakaiimpeksion puedeng olangon kaiyan an pagpunsionar kan sistema nin inmunidad kan pasyente.” Minsan ngani nainaan na an pagkaolakit nin AIDS paagi sa pagsiyasat sa dugo, igwa pa man giraray nin dakol na helang na dai naririsa sa siring na mga pag-eksamin. Asin sa ibong kan pangangaipo nin mas dakulang preparasyon, an pag-operar na dai naggagamit nin dugo ekonomiya para sa mga ospital, mantang hinahale kaiyan an legal na mga problema na tibaad ibunga kun an mga pasyente makaako nin naolakitan na dugo.

Para sa Mga Saksi ni Jehova, igwa nin mas mahalagang rason sa paglikay na dai paineksion nin dugo: ipinangangalad iyan kan ley nin Dios. (Gibo 15:29) Pero, boot nindang akoon an pinakamarahay na mahihimong medikal na pagbolong. Sa siring, sinda nakikikooperar sa mga doktor na nangengenot sa pagsiyasat sa medikal na pagbolong na dai naggagamit nin dugo. An siring kapakipakinabang bako sanang sa Mga Saksi ni Jehova kundi siring man sa dakol na iba pa na nahahadit manongod sa mga peligro kan mga pag-ineksion nin dugo.

[Nota sa Ibaba]

[Pasasalamat para sa pinagkuanan kan retrato sa pahina 32]

Retrato kan WHO ni P. Almasy