“Dai Nindo Sinda Pahaleon!”

“KUN an saro sa Mga Saksi ni Jehova, o duwa pa ngani, tumimbre sa saindong pinto, dai nindo sinda pahaleon!” an sabi kan Corriere della Sera. Nasasambitan kan peryodiko an sarong eksena na nangyari sa Treviso, amihanan na Italia, kun saen an sarong negosyante nameligrong mawaran nin labing sarong milyon na lira (labing $600, E.U.) huli sa pagpahale sa duwang Saksi na nagsongko sa saiya.

Sono sa peryodiko, an duwang Saksi nagpamidbid sa lalaki paagi sa mga tataramon na: “Sarong marahay na aldaw po ini para sa saindo. Mga Saksi ni Jehova kami, asin may itatao kami sa saindo na mahalagang marhay.” Pero, isinirra kan antipatikong negosyante an pinto, na dai sinda tinogotan na makatapos.

Kun naghinanyog an lalaki, naaraman kutana nia na an mga Saksi nagduman sa saiyang harong tanganing iuli an saiyang pitaka, na nakua ninda sa sarong tukawan sa parke. Kaya mayong ibang maginibo an mga Saksi kundi darahon an pitaka kaiba an mga laog kaiyan sa pinakaharaning presinto. Kan sumunod na aldaw, iinuli iyan kan mga pulis sa talagang kagsadiri kaiyan.

“Kun iba an nasa kamugtakan kan duwang bigo[ng Saksi],” an sabi kan Il Gazzettino di Treviso, “posibleng itinago na nia an dakulang laog kan pitaka. Alagad bakong an Mga Saksi ni Jehova, na siertong lubos na sadiosan.”

Ano an nagpapahiro sa Mga Saksi ni Jehova na magin “lubos na sadiosan”? An saindang pagkamoot sa Dios asin sa kataed, na kaoyon sa mga katokdoan ni Jesu-Cristo. (Mateo 22:​37-39) Iyan man an dahelan kun taano an Mga Saksi ni Jehova ta naghaharongharong tanganing ibalangibog an maogmang bareta manongod sa makangangalas na “bagong daga” na ipinanuga ni Jehova Dios. An siring na mensahe nin paglaom labi pang marhay an halaga kisa sa ano man na materyal na rogaring!​—2 Pedro 3:13.