Sinusuportaran kan Leyenda Dapit sa Baha an Tala kan Biblia
AN Delubyo sa bilog na globo kaidtong kaaldawan nin Noe sarong makasaysayan na katunayan. An mga bersion kan tala manonompongan sa berbal na kasaysayan nin dakol na laen-laen na sibilisasyon sa bilog na kinaban. Sa nasyon sa Aprika na Chad, arog kaini an paliwanag kan tribong Moussaye dapit sa Baha:
‘Kaidtong panahon, sa sarong harayong lugar, may sarong pamilya. Sarong aldaw, an ina kan pamilyang ini gustong magluto nin masiram na pagkakan para sa saiyang mga namomotan. Kaya kinua nia an saiyang lubang asin halo tanganing bayohon an tipasi na magin harina. Kan panahon na idto an langit mas hababa kisa sa kamugtakan kaiyan ngonyan. Sa katunayan, kun iaabot nindo an saindong kamot, maduduotan nindo iyan. Binayo nia an tipasi sa bilog niang kosog, asin an tipasi na binabayo nia madaling nagin harina. Alagad mantang sia nagbabayo, daing ingat na ikinaitaas na marhay kan babae an halo, asin nakakulkog sia nin labot sa langit! Tolos-tolos, an gulping tubig nagpoon na maholog sa daga. Bako ining ordinaryong oran. Nag-oran nin pitong aldaw asin pitong banggi sagkod na an bilog na daga nalantopan nin tubig. Mantang nag-ooran, an langit nagpoon na umitaas sagkod na iyan nakaabot sa namumugtakan kaiyan ngonyan—sa dai maaabot na langkaw. Kanigoan na kapahamakan para sa katawohan! Poon kaidto, nawara niato an pribilehio na maduotan an langit.’
Interesante nanggad, manonompongan sa bilog na kinaban an suanoy na mga estorya na nagsasabi dapit sa sarong baha sa bilog na globo. An enot na mga sibilisasyon sa amihanan asin timog na Amerika pati an mga Propio sa Australia gabos igwa nin mga estorya manongod kaiyan. Tibaad magkalaen an mga detalye, alagad an kadaklan na estorya igwang ideya na an daga kaidto nalantopan nin tubig asin nagkapira sanang tawo an nakaligtas sa sarong baroto na gibo nin tawo. An lakop na pagkaigwa kan temang ini nakadadagdag nin patotoo sa bagay na talagang nangyari an sarong Delubyo sa bilog na kinaban, siring kan ibinareta sa Biblia.—Genesis 7:11-20.