Sarong Kaotoban kan Hula sa Biblia
MAHEHELING sa Imperial War Museum sa Londres, Inglaterra, an sarong napapalaen na relo asin sarong elektronikong digital na kontador. Mantang nag-iitok an relo, an kontador naglalagatik kada 3.31 segundos. Sa kada lagatik sarong numero an idinadagdag sa total. An kada lagatik, kada numero, nagrerepresentar sa sarong lalaki, babae, o aki na nagadan huli sa guerra durante kan siglong ini.
An kontador nagpoon sa pagkuenta kan Hunyo 1989 asin linalaoman na matatapos an pagbilang sa matanga kan banggi sa taon 2000. Sa panahon na iyan an numero sa kontador makarerehistro nin sien milyon—an kinakarkulong bilang nin mga nagadan huli sa guerra sa bilog na ika-20 siglo.
Haros 2,000 na taon na an nakaagi, ihinula ni Jesu-Cristo an sarong panahon na tatandaan nin ‘nasyon na minatindog tumang sa nasyon asin kahadean tumang sa kahadean.’ Huli kaiyan, an Mga Saksi ni Jehova kaidto pa naghuhulit na an biyong mapanlaglag na mga guerra sa siglong ini, kaiba an dakol na linog, peste, kakulangan nin kakanon, asin iba pang pangyayari, sa kabilogan nagtatao nin prueba na kita nabubuhay na sa “huring mga aldaw”—an peryodo nin panahon na kasunod kan pagpatukaw ki Cristo bilang Hade sa langit kan taon 1914.—Lucas 21:10, 11; 2 Timoteo 3:1.
Ginagamit an Biblia bilang autoridad, ipinapaisi kan An Torrengbantayan an maogmang bareta na sa dai na mahahaloy lalaglagon kan Kahadean nin Dios an mga nan-aapi asin gigibohon an daga na magin paraiso. Asin kumusta an manongod sa ngapit nin mga guerra? An Biblia nagsasabi: “Madia kamo, banwaan, helinga nindo an mga ginigibo ni Jehova, kun paano sia nagbugtak nin mga ngangalasan sa daga. Pinaoontok nia an mga ralaban sagkod sa kaporoporohi kan daga. An arko saiyang binabari asin pinagpuputolputol an garod; an mga karro [de guerra] saiyang sinosolo sa kalayo.”—Salmo 46:8, 9.
[Pasasalamat para sa pinagkuanan kan retrato sa pahina 32]
Relo: Sa Karahayan nin boot kan Imperial War Museum