“Sinimbag ni Jehova an Sakong mga Pamibi!”
SA BILOG na kinaban, an Mga Saksi ni Jehova nagkokondukta nin haros limang milyon na pag-adal sa Biblia sa harong sa mga tawo na interesadong magkamit nin tamang kaaraman manongod sa Dios asin sa saiyang makangangalas na katuyohan para sa katawohan. Pati an mga aki sa tahaw kan Mga Saksi ni Jehova igwa nin kabtang sa gibohon na ini. Helinga, halimbawa, an sarong aking lalaki na an ngaran Joel. Sinimbolisaran nia an saiyang pagdusay ki Jehova asin nabautismohan sa edad na nuebe anyos. Pakalihis nin sarong taon ini an saiyang naeksperyensiahan:
“Mantang nasa ministeryo, nanompongan ko an sarong babae na an ngaran Candy. Iinalok ko saiya an brochure na ‘Uya! Ginigibo Kong Bago an Gabos na Bagay.’ Igwa na sia kaiyan, kaya iinalok ko sa saiya an librong Puwede Kamong Mabuhay Sagkod Lamang sa Paraiso Digdi sa Daga. Igwa na man sia kaiyan. Dangan inisip ko, ‘aalokon ko an babaeng ini nin pag-adal sa Biblia.’ Inako nia!
“An tugang na babae ni Candy, na magagadan na huli sa kanser, nag-iistar kaiba nia sa harong. Dugang pa, si Candy nag-aadal na magin nars. Kaya sa sarong peryodo nin panahon, pinondo an pag-adal sa Biblia. Alagad an sakong mga magurang asin ako nagdanay na may komunikasyon sa saiya paagi sa pagwalat kan mga magasin sa saiya o sa saiyang agom, si Dick. Sinabi sa samo ni Dick na ibinubugtak ni Candy sa katre an mga magasin asin binabasa iyan sa banggi.
“Pag-abot nin panahon, nagadan an tugang ni Candy. Si Tatay asin si Nanay patin ako nakipag-olay ki Candy manongod sa kamugtakan kan mga gadan. Nagdesisyon siang ipadagos an saiyang pag-adal sa Biblia. Sa ibang aldaw, hinapot mi si Dick kun boot niang mag-adal kaiba ni Candy asin gibohon iyan na pampamilyang pag-adal. Naisip nia na marahay na ideya idto. Kaya ngonyan, kaiba ni Tatay ko, inaadalan ko kapwa si Dick asin Candy. Marahay an saindang pag-oswag asin nagpapahayag nin pag-apresyar sa pag-adal sa Biblia.
“Nagpaparapamibi akong magkaigwa nin inaadalan sa Biblia, asin sinimbag ni Jehova an sakong mga pamibi!”