“Kita Gabos Kabilang sa Sasarong Pamilya”
SA DAI pa sana nahahaloy na mga taon an relihiosong prehuwisyo asin rasismo luminakop sa bilog na daga. An etnikong mga pagkakalaen nakaagyat nin garadanan, pagpasakit, asin iba pang makasosopog na kabikoan. Sono sa sarong report kan Amnesty International, huli sa mga pagbalga sa mga diretso nin tawo an labing 23 milyon katawo sa bilog na kinaban napiritan na dumulag sa saindang mga harong kan 1994.
Sa Rwanda sana, mga 500,000 katawo an ginadan asin labing 2,000,000 na iba pa an nagin dulag pakatapos na pumutok an kadahasan sa pag-oltanan kan mga Tutsi asin Hutu. “An Mga Saksi ni Jehova nangorognang pinaglamag,” an ibinareta kan peryodiko sa Belgium na Le Soir, “huli sa pagsayuma nindang magdara nin mga armas.” An Mga Saksi ni Jehova dai nakikikabtang sa armadong iriwal. Minsan siring, ginatos sa sainda an nagadan sa kadahasan. Ipinagigirumdom kaini sa sato an mga tataramon ni Jesus sa saiyang mga disipulo: “Huling kamo bakong kabtang kan kinaban, . . . an kinaban naoongis sa saindo.”—Juan 15:19.
An sarong pamilyang Saksi—si Eugène Ntabana, an saiyang agom, asin duwang aki—nag-eerok sa kabisera, an Kigali. Kun ipinaliliwanag sa saiyang kataraed an Kristianong neutralidad, parateng nasasambitan ni Eugène an buganvilla, sarong nagkakanap na tinanom na matubang sa mainit na mga klima.—Mateo 22:21.
“Digdi sa Kigali,” an ipaliliwanag ni Eugène, “an buganvilla namumurak nin pula, rosa, asin kun minsan puti. Pero, iyan gabos kabilang sa sasarong pamilya. Kapareho iyan kan mga tawo. Minsan ngani tibaad magkalaen kita nin rasa, kolor nin kublit, o etnikong pinaghalean, kita gabos kabilang sa sasarong pamilya, an pamilya nin katawohan.”
Makaturotriste nanggad, apisar kan saindang matoninong na naturalesa asin neutral na paninindogan, an pamilyang Ntabana ginadan nin sururog na paha sa dugo. Pero, sinda nagadan na fiel. Makaseseguro kita na ootobon ni Jehova Dios an saiyang panuga sa mga siring, asin sinda bubuhayon liwat tanganing manahon an sarong kinaban na mayo na an prehuwisyo. (Gibo 24:15) Dangan, an pamilyang Ntabana, kaiba an iba pa, “magkakararanga nin labi-labi sa nagsosopay na katoninongan.”—Salmo 37:11.