Pinatunayan Liwat an Diretsong Magkaigwa nin may Kabatidan na Pagtogot

AN SARONG dai pa sana nahahaloy na sentensia na ipinahayag kan Huwes Para sa Preliminaryong mga Imbestigasyon kan Korte sa Messina, Italia, nagpatunay liwat na an medikal na mga kagustohan nin sarong pasyenteng adulto obligatoryo para sa mga doktor. An desisyon ilinuwas sa sarong kaso may labot sa saro sa Mga Saksi ni Jehova.

Kan Enero 1994, si Antonino Stellario Lentini, sarong 64 anyos na pasyenteng Saksi na may helang sa dugo na an resulta daing kontrol na pagdudugo minsan sa saradit na lugad, idinalagan sa ospital sa Taormina, Messina. An agom ni Antonino, si Catena, nagpaliwanag sa mga tawohan kan ospital na bilang mga Saksi ni Jehova sia asin an saiyang agom dai matogot sa pag-ineksion nin dugo. (Gibo 15:​20, 28, 29) Iginalang an saindang mga kagustohan.

Minsan siring, kan ibinabiahe pasiring sa saro pang lugar nin pag-ataman sa salud, nagpiot an paghangos ni Antonino asin uminabot na nasa kritikal na kamugtakan. Dai nahaloy pakatapos kaiyan, nagadan sia. Mamondong marhay si Catena, alagad naranga siang marhay sa panuga kan Biblia na pagkabuhay liwat. (Gibo 24:15) Dangan, sa dakulang pagkabigla nia, an mga mahistrado​—na posibleng nadaya nin salang mga bareta na pinalakop kan media—​sinahotan sia na iyo an dahelan kan pagkagadan kan saiyang agom huli ta sinayumahan nia an operasyon na sinabi kan mga doktor na kaipuhan.

Pakalihis nin labing sarong taon, kan Hulyo 11, 1995, si Catena ipinahayag na daing sala, ta dai man siang nakomitir na krimen. Sa katunayan, an patotoo kan mga eksperto nagdoon na, kun kokonsideraron an kamugtakan kan pasyente, sayang na man sana an pag-operar.

Alagad an mga pahayag kan huwes nagparisa kan pangenot na isyu. Masakit akoon, sabi nia, an ideya na an medikal na personahe kaipuhan na makilabot kun an pagbolong sinasayumahan kan pasyente o kan mga tawo na nagrerepresentar sa saiya. An kodigo sa moral na obligasyon sa medisina sa Italia, sabi pa nia, “hineheling nin patienot an pangangaipo na kuanon an may kabatidan na pagtogot kan interesadong tawo bago an ano man na pakikilabot.” Sa siring, sinabi nia na si Catena “sono sa ley na ilinikay an saiyang agom na mapasairarom nin siring na operasyon.”

Pinatutunayan liwat kan paghokom na ini an diretso nin sarong adulto na sayumahan an medikal na pagbolong na kontra sa saiyang mga kagustohan.