‘Interesado Sinda sa Pagtabang sa Iba’
IYAN an sinabi nin sarong pulis sa Siudad nin Nueva York manongod sa Mga Saksi ni Jehova. Kaolay nia si Kathleen, saro sa bilog na panahon na mga boluntaryo na naglilingkod sa pankinaban na opisina prinsipal kan Mga Saksi ni Jehova sa Brooklyn, Nueva York.
Durante kan saiyang pahingalo sa odto, sa sarong maharasahas asin masaldang na aldaw nin tigrakdag, si Kathleen tuminukaw sa sarong bangko sa kaharaning Pasyaran. Naghihinanyog sia sa sarong audiocassette na igwang mga headphone. Sa sarong landingan nin helikopter sa ibong kan Salog nin Sirangan, ginigibo an mga pag-andam para sa paghale kan papa, na nasa pagsongko sa siudad. Makosog an seguridad sa gabos na lugar, asin may nagkapirang pulis na nagpapatrolya sa Pasyaran. An saro sa sainda nagdolok ki Kathleen asin naghapot kun ano an ginigibo nia. Nagsimbag si Kathleen: “Naghihinanyog ako sa sarong tape sa lenguaheng Ruso. Aram nindo, saro ako sa Mga Saksi ni Jehova, asin gusto kong makanood nin Ruso tanganing ikahiras an maogmang bareta kan Kahadean nin Dios sa mga tawong Ruso an tataramon na digdi na nag-eerok sa siudad.”
An pulis nagsimbag na nagtalubo an paghanga nia sa Mga Saksi ni Jehova durante kan saiyang nakaaging 15 taon bilang nagpapatrolyang pulis sa Siudad nin Nueva York. Sia nagsabi: “Ibinibilang ko an Mga Saksi ni Jehova na sarong organisadong relihion na an mga miembro sinsero an interes sa pagtabang sa iba sa komunidad.”
An Mga Saksi ni Jehova midbid sa bilog na kinaban huli sa ginigibo nindang paghuhulit sa harong-harong. (Gibo 20:20) Mantang itinotokdo ninda an Kahadean nin Dios bilang an solamenteng solusyon sa mga problema na nandadamat sa katawohan, tinatabangan man ninda an mga tawo na paoswagon an saindang kualidad nin buhay paagi sa pagparigon kan saindang boot na iaplikar sa pan-aroaldaw nindang buhay an mga prinsipyo sa Biblia. Halimbawa, an mga magurang dinadagka kan mga Saksi na tumao nin mga kamugtakan sa harong na makapaooswag sa pag-adal. Sinasadol ninda an mga indibiduwal na magin sadiosan asin makinuyog sa ley, na ineenkaminar sinda na magkaigwa nin mga abilidad asin kualidad na kapakipakinabang sa pagmansay kan mga among.
Iyo, an Mga Saksi ni Jehova interesadong marhay sa pagtabang sa mga tawo sa komunidad na mapaoswag an saindang buhay. Kamo maogmang iniimbitaran na himateon an minasunod na alok.