Sairisay an Magigin mga Paraebanghelyo?

SA SARONG miting kan Pankinaban na Konsilyo nin mga Iglesia mga 40 taon na an nakaagi, an mga miembro sinadol na “lumuwas na may espiritu nin pag-ebanghelyo” asin tokdoan an saindang mga aripompon na “pumoon na mag-ebanghelyo.” Pakalihis nin limang taon si John A. O’Brien, sarong klerigong Katoliko, nagsurat manongod sa pangangaipo na maglaog nin bagong mga disipulo “paagi sa pagduman sa sainda” asin bako sanang “paagi sa pagtukawtukaw sa satong mga harong.” Asin kan Enero 1994, si Papa Juan Paulo II nagsabi na ngonyan “bakong panahon na ikasopog an Ebanghelyo, panahon nang ihulit iyan hale sa mga atop.”

Minalataw na dai hinihimate an abot-abot na pangapodan na ini para sa mga paraebanghelyo. An sarong artikulo sa peryodiko sa Australia na Illawarra Mercury nagsabi: “An prominenteng mga Katoliko sa Timog na Baybayon bakong interesado na arogon an pamamaagi kan Mga Saksi ni Jehova sa saindang pagtubod.” An sarong lalaki nagsabi na an pag-ebanghelyo “bako [nanggad] na kabtang kan Katolikong mentalidad.” An saro pa nangatanosan: “Marahay na paoswagon kan Iglesia an sadiri nia, alagad bakong paagi sa pagtoktok sa mga pinto. Tibaad mas marahay an paagi sa mga eskuelahan o pagpadara nin mga surat.” Minsan an dekano nin sarong lokal na katedral bako nanggad na segurado kun paano iinterpretaron an mga tataramon kan papa. “Eenkaminaron mi an mga tawo na gibohon an Ebanghelyo na aram ninda sa sadiri nindang buhay,” an sabi nia. “Kun baga iyan nangangahulogan nin pagtoktok sa mga pinto iba nang orolay.” Marahay an pagkasumaryo kaiyan kan titulo kan bareta: “Habong himateon kan mga Katoliko an pangapodan kan Papa na maghulit.”

Sa ibong kan dai pakapag-ebanghelyo kan Kakristianohan, labing limang milyon na Saksi ni Jehova an nagsusunod sa pagboot ni Jesus na “paduman kamo asin gumibo kamo nin mga disipulo sa mga tawo kan gabos na nasyon.” (Mateo 28:​19, 20; ikomparar an Gibo 5:42.) An saindang paghuhulit sa harong-harong ginigibo ngonyan sa labing 230 kadagaan. Positibo an dara nindang mensahe, na itinatampok an makangangalas na mga panuga kan Biblia para sa ngapit. Taano ta dai makipag-olay sa sainda sa sunod nindang pagsongko?