Gabos Kapahayagan nin Dios?
PUEDE daw na an espiritu nin Dios, na nagpasabong kan Banal na Biblia, iyo man an nagpasabong kan ibang libro na ibinibilang nin nagkapira na banal? (2 Timoteo 3:16) An hapot na ini pinalataw nin sarong babasahon na Jesuita sa Italia (La Civiltà Cattolica), na ipinublikar “sa pagdirehir kan Sekretariya kan Estado” sa Batikano asin sa siring ibinibilang na may autoridad sa tahaw nin mga Katoliko.
“An Dios, paagi sa paghiro kan Banal na Espiritu, iwinarak an banhi kan Tataramon minsan sa nagkapirang banal na libro nin tradisyon na bakong Judio asin bakong Kristiano,” an sabi kan babasahon na Jesuita. Para sa mga Jesuita, an “banal” na mga libro, arog baga kan Avesta kan mga Zoroastriano o an Apat na Libro kan mga Confuciano, isinurat na “igwang partikular na impluwensia kan Banal na Espiritu, asin kun siring, sa limitadong sokol an mga iyan igwa nin ‘kapahayagan nin Dios.’”
Minsan siring, may ginibong paglilinaw an artikulo. “Bakong gabos na yaon sa siring na banal na mga libro tataramon nin Dios,” an sabi kaiyan, na sinasabi pa na an mga nagsurat kan mga librong ini tibaad “naimpluwensiahan nin paniniwala sa dakol na dios o kan pilosopikong kamugtakan” na dian sinda nabuhay asin naghiro. Sono ki Marco Politi, na kabaretaan sa mga aktibidad kan Batikano para sa Italianong peryodiko na La Repubblica, an paninindogan na ini “binubuksan an dati garo imposibleng relasyon sa pag-oltanan kan Iglesia Katolika asin kan darakulang makasaysayan na relihion,” na binabalikan an espiritu nin mga pagtiripon para sa pamimibi nin laen-laen na relihion arog kan sa Assisi kan 1986, na entusiastikong pinalakop ni Juan Paulo II.
Si Jehova bakong Dios nin kariribokan asin karibarawan. (1 Corinto 14:33) Kaya dai kita tamang makakokonklusyon na ipapasabong kan saiyang banal na espiritu, o puersa aktiba, an minsan kabtang sana nin ano man na mga libro na bakong lubos na kaoyon kan saiyang Tataramon, an Biblia. Imbes na enkaminaron an ekumenikal na mga pamamaagi sa pag-oltanan nin laen-laen na “tradisyon nin relihion,” an Kristianong apostol na si Pablo nagsurat na igwa nin “sarong paglaom . . . , sarong Kagurangnan, sarong pagtubod, sarong bautismo.”—Efeso 4:4, 5.
An “sarong paglaom” na iyan nasasarig sa pagtubod ki Jesu-Cristo. An Biblia angay na nagsasabi: “Mayo nin kaligtasan sa siisay pa man na iba, huli ta mayo na nin ibang ngaran sa sirong nin langit na itinao sa mga tawo na sukat makaligtas sa sato.” (Gibo 4:12) Mayo na nin ibang “banal na libro” na ipinamimidbid si Jesus bilang an may pangenot na kabtang sa paghaman sa mga katuyohan nin Dios. Saka sana kita matotokdoan kaiyan manongod sa mamomoton na mga probisyon ni Jehova Dios para sa kaligtasan kun aakoon niato an Biblia bilang an Tataramon nin Dios.—Juan 17:3; 1 Tesalonica 2:13.