Saro Pang Kapangganahan Para sa mga Saksi ni Jehova sa Grecia

KAN Oktubre 6, 1995, an sarong kaso legal na kalabot an duwang bilog na panahon na ministro kan Mga Saksi ni Jehova binista kan tolo an miembrong Korte de Mahistrado sa Atenas. An akusasyon proselitismo, asin an demanda isinangat nin sarong pulis pakatapos na an mga Saksi magsongko sa saiyang harong.

An mga ihinapot kan nangengenot na huwes nagpaheling na sia interesadong marhay sa gibohon kan Mga Saksi ni Jehova. Halimbawa, ihinapot nia: “Gurano na kahaloy na ginigibo nindo ini? Paano kamo tinatrato kan mga tawo sa nakaaging mga taon? Ano an nagigin reaksion sa saindong gibohon? Ano an sinasabi nindo sa mga tawo sa saindang pinto?” An gabos na presente sa korte atentong naghinanyog sa ikinataong marahay na patotoo.

Sa pagkabiglang marhay kan mga Saksi, maski an piskal nagtaram apabor sa sainda. “An Mga Saksi ni Jehova igwa nin konstitusyonal na diretso na bako sanang magtubod asin sumamba sa saindang Dios,” an paliwanag nia sa saiyang pantapos na pagtaram, “kundi palakopon man an saindang pagtubod sa mga pinto, sa pampublikong mga plasa, asin sa mga tinampo, na iwinawaras pa ngani an saindang mga babasahon na daing bayad kun gusto ninda.” Sinitar kan piskal an laen-laen na desisyon nin pag-absuelto na ilinuwas kan mga korte asin kan Konsilyo nin Estado. Sinambit man nia an kasong Kokkinakis v. Greece, na dinesisyonan apabor sa Mga Saksi ni Jehova kan Korte Para sa mga Diretso nin Tawo sa Europa.a “Mangnoha tabi nindo,” an patanid kan piskal, “na an Grecia nagbayad pa ngani nin multa sa kasong ini. Kaya maninigo kitang mag-ingat na gayo kun hinahagadan na husgaran an siring na mga kaso. An totoo, sa primero ngani maninigo na nungkang darahon sa korte an mga kasong ini.”

Kasunod kan pagtaram kan piskal, mayo nang dakol pang dapat sabihon an abogado kan mga Saksi. Minsan siring, inaprobetsaran nia an oportunidad tanganing idoon na an ley sa proselitismo bakong oyon sa konstitusyon asin ipinasosopog kaiyan an Grecia sa internasyonal na sokol.

Hineling na sana kan nangengenot na huwes an duwa pang huwes, asin may pagkaoroyon na inabsuelto an tugang na lalaki asin babae. An bista, na nagsarong oras asin sampulong minuto, sarong kapangganahan kapwa para sa ngaran ni Jehova asin sa saiyang banwaan.

Ini an ikaapat na pag-absuelto may labot sa mga kaso nin proselitismo pakatapos na bistahon kan Korte Para sa mga Diretso nin Tawo sa Europa an kaso ni Kokkinakis. An Mga Saksi ni Jehova sa Grecia naggagayagaya na an mga problema may koneksion sa saindang paghuhulit haros mayo na ngonyan asin puede nang ipadagos an gibohon na daing kaolangan.

[Nota sa Ibaba]