“Saro Sana sa Dakol na Buhay na Pinahiro Nindo”
KAIDTONG Enero 1996, si Carol may helang na tumor sa hotok. Labi na siang 60 asin sagkod kaidto permi siang maogma, mabaskog na babae na may positibong tataramon para sa gabos. Alagad ngonyan an mga doktor nagmamaigot na daogon an nakagagadan na pagtubo. Mantang sia nagsasakit, naresibi ni Carol an minasunod na surat:
“Namomotan na Carol:
“Namomondo akong marhay manongod sa saindong nagluluyang salud. Marahay sana ta yaon sa sato an tunay na paglaom na an Biblia tinatabangan kitang maaraman asin kamotan. An paglaom na ini iyo na an Kahadean ni Jehova mamahala sa daga tanganing mabuhay kita sa sarong paraisong kamugtakan, sarong panahon na tinatanaw niato gabos.
“Gusto kong maaraman nindo na ikinaligtas kan saindong personal na paghuhulit an dakol na tawo sa daing katapusan na kagadanan. Saro ako sa mga tawong ini. Dai ko segurado kun natatandaan pa nindo an enot niatong paghelingan. Kan panahon na idto 20 anyos ako. Halaba an bohok ko, nagpapabakal nin droga, asin nagpaparaistambay kaiba nin grupo nin mga butangero. Kami gabos may darang badil asin mayo nin tunay na pagkamoot apuera sa samong sadiri.
“Nagtoktok kamo sa sakong pinto kaiba an saro pang Saksi asin inalok ako kan An Torrengbantayan asin Awake! Prinobaran kong tawan kamo nin sarong dolyar asin sinabi ko na habo ko kan mga magasin. Ipinaaram nindo sa sako na dai kamo naghuhulit tangani sanang makakua nin mga donasyon. Sinabi nindo sa sako na may ginigibo kamo tanganing tabangan an mga tawo na basahon an Biblia. Dai ko segurado kun kinua ko an mga magasin o binasa iyan. Minsan siring, itinanom nindo an banhi nin katotoohan sa sakong buhay.
“Pakalihis nin nagkapirang taon saro pang Saksi, si Gary, an nagduman sa harong kan sakong ina kan panahon na yaon ako duman. Sinabi ko sa saiya an saindong pagsongko nagkapirang taon bago kaini. Nag-adal kami ni Gary sa Biblia sa haloy na panahon sagkod na sa katapustapusi nabautismohan ako kan 1984. Ngonyan itinotokdo ko sa sakong mga aki an katotoohan dapit sa Kahadean nin Dios.
“Segurado ko na saro sana ako sa dakol na buhay na pinahiro nindo sa dakol na taon nin saindong fiel na paglilingkod. Minsan siring, paagi sa mamomoton na kabootan na ini, pinangyari nindo ako asin an sakong pamilya na mamidbid an Dakulang Dios, si Jehova, asin an saiyang Aki, si Cristo Jesus. Tinatanaw ko sa enotan an aldaw na maheheling ko kamo sa bagong palakaw nin mga bagay na sa panahon na iyan papahidon ni Jehova an gabos na luha sa satong mga mata, asin an kagadanan mawawara na.—Kapahayagan 21:4.
“Kun dapit sa sako asin sa sakong pamilya, naoogma kami ta nagkaoportunidad kaming mamidbid kamo asin magin kabtang kan saindong pagpapatotoo. Salamat sa saindo.
“May sa-tugang na pagkamoot,
Peter”
Pakalihis nin anom na bulan na paghelang, si Carol nagadan kan Marso 1996, na nakapagtanom nin dakol na banhi nin katotoohan sa saiyang 35 taon bilang maigot na paraebanghelyo. Nanodan nia na nungkang aram nin saro kun noarin magbubunga an sarong banhi, pakalihis nin dakol na taon pa ngani.—Mateo 13:23.