Pagkontra sa Falsong mga Akusasyon sa Pransia
AN Mga Saksi ni Jehova sa Pransia kasuarin pa sana pinaoranan nin falsong mga akusasyon. Ginagamit na padatolan an makaturotristeng mga pangyayari may labot sa relihiosong mga kulto sa Europa asin Hapon, pinalalakop kan media an biribid an kahulogan na impormasyon manongod sa mga Saksi. Sinda salang ilinadawan bilang saro sa pinakadakula asin pinakapeligrosong mga kulto.
Sa paghihingoang itanos an mga bagay, ipinublikar kan Mga Saksi ni Jehova an sarong tract na nagsimbag sa mga hapot na siring kaini: Sairisay an Mga Saksi ni Jehova? Sinda daw mga Kristiano? Nag-aako daw sinda nin medikal na pagbolong? Taano sinda ta naghaharongharong? Paano sinusustentohan an saindang gibohon? Paano nakikinabang an komunidad sa Mga Saksi ni Jehova?
An nakapagtotokdong tract sa lenguaheng Pranses may titulong Jehovah’s Witnesses—What You Need to Know. Tanganing ikapasakamot an tract sa pinakadakol na tawong mapupuede, inorganisar an sarong kampanya. Poon kan Mayo 13 sagkod Hunyo 9, 1996, labing siam na milyon na kopya an ikinadistribwir.
An tract na ini nakaimpluwensia sa dakol, kabale na an pampublikong mga opisyal. “Grabe an gurobgutob ko sa pagkritika sa Mga Saksi ni Jehova,” an isinurat nin sarong konsehal nin rehion kan mabasa an tract. “Dakol na beses kong inaapresyar an pagkamatinao asin daing kapasloan kan saindong gibohon.” Sa pagsimbag sa tract, an sarong miembro kan Parlamento Europeo nagsurat: “An mayoriya kan mga tawo nakamimidbid nanggad kan kalaenan kan grupo nin mga Kristiano na kinabibilangan nindo asin kan mga kulto.”
Sa Brittany iprinesentar nin sarong Saksi an tract sa sarong padi, na tolos na nag-ako kaiyan. “Kinokomendaran ko kamo huli sa saindong ginigibo,” an sabi kan padi. Dangan idinugang nia: “Ineenkaminar ko an mga miembro kan sakong parokya na padagoson kamo sa saindang harong asin alokon kamo na magkape. Puede pa ngani nindong sabihon sa mga nanonompongan nindo na hale na kamo sa sakong harong. Gusto ko man na sabihon sa saindo na pinahahalagahan kong basahon an saindong mga publikasyon.”
Pakatapos na maresibi an tract, an sarong Protestanteng lalaki sa Alsace nagsurat sa Watch Tower Society na naghahagad nin pag-adal sa Biblia. “Mantang nawara na an gabos kong kompiansa sa sakong iglesia,” an isinurat nia, “naglalaom ako sa sarong bagong kapinonan sa espirituwal.” Sa ibong kan falsong mga sahot na kun minsan ipinupunteriya sa sainda, an Mga Saksi ni Jehova sa Pransia—tunay nanggad, sa gabos na kabtang kan kinaban—padagos na tinatabangan an mga tawo na makaabot sa tamang kaaraman manongod sa mga katuyohan nin Dios, siring sa sinasabi sa Biblia.—2 Timoteo 3:16, 17.