An Sarong 403 Anyos na Pag-agoman Namemeligro
SA Sweden, an Iglesia asin Estado igwa nin dayupot na relasyon sa laog na nin labing 400 na taon. Ngonyan an pag-agoman sa pag-oltanan nin relihion asin gobyerno nagluluya.
An Luteranismo inestablisar bilang relihion kan Estado kan 1593, asin an gabos na Sueco kaipuhan na magin bautisadong miembro. Pakalihis nin mga taon, durante kan mga taon nin 1850, ginibo an pagliliwat. Dai na kaipuhan nin mga Sueco na magpabautismo; minsan siring, ibinibilang pa man giraray sinda na mga miembro kan Iglesia Luterano. Bilang siring, hinahagadan sindang magbayad nin 1 porsiento kan saindang may buwis na entrada tanganing sustentohan an iglesia asin bayadan an nagkapirang serbisyo sibil kan iglesia. Mas bago pa an saro pang pagbabago nangyari. Poon kan 1952, an mga Sueco puede nang maghale sa iglesia sa legal na paagi asin sa siring makalibre sa pagbayad sa dakulang kabtang kan buwis sa iglesia.
Sa dai pa sana nahahaloy na mga taon an Iglesia Luterano padagos na nawawaran nin kontrol sa Sweden. Ini dai maeebitaran, mantang 10 porsiento kan mga nag-iistar sa Sweden mga dayo na bakong Luterano, kabale na an mga Judio, Katoliko, asin Muslim. Sa siring, sa pagpopoon kan 1996, 86 porsiento na sana kan mga Sueco an nasa Iglesia Luterano, asin an bilang padagos na nagbababa.
An nagtatalubong pagkaindiperente puersadong pinagsusuhay an Iglesia asin Estado. Idineklarar nang an hade dai kaipuhan na sarong Luterano, asin an mga aki nin Luteranong mga magurang dai automatikong ibinibilang na mga miembro kan Iglesia Luterano kan Estado. Dugang pa, sono sa The Dallas Morning News, pag-abot kan taon na 2000, “kaipuhan na tasaran asin bangaon kan lokal na mga parokya asin kan estado an kadakoldakol na propiedad. Kaipuhan na inaan kan iglesia an $1.68 bilyones na taonan na badyet kaiyan, na an kadaklan kinokolekta paagi sa buhis.” Pakalihis kan taon 2000, an iglesia na an manombra sa sadiri kaiyan na mga obispo.
Mantang an pagkaindiperente asin pagdikit nin miembro nandadamat sa Kakristianohan, an Mga Saksi ni Jehova sa Sweden padagos na nag-ooswag. An 1997 Yearbook of Jehovah’s Witnesses nagreport na 24,487 an parahayag kan Kahadean nin Dios sa dagang iyan, asin haros 10 porsiento an naghuhulit bilang bilog na panahon na mga ministrong payunir. An dakol kaini naghihingoang maabot an orog pang mga pribilehio sa paglilingkod. Halimbawa, durante kan 1995 pandistritong mga kombension kan Mga Saksi ni Jehova, 20 mag-agom an nagsumitir nin mga aplikasyon para sa pagsasanay bilang misyonero sa Paadalan sa Biblia kan Watchtower sa Gilead. Sa panahon na iyan, igwa nin mga 75 Sueco na naggradwar sa nakaaging mga klase na naglilingkod bilang mga misyonero sa manlaenlaen na parte kan kinaban. Daing duwa-duwa, an saindang marahay na halimbawa asin nakaparirigon sa boot na mga surat asin pagdalaw igwa nin nakaaanimar na epekto sa mga nagpaplano ngonyan para sa dakulang pribilehiong ini.
Sa siring, mantang an minilyon sa Kakristianohan nagsasakit huli sa pagkalaglag kan espiritu, an Mga Saksi ni Jehova ‘nagkukururahaw sa kagayagayahan huli sa marahay na kamugtakan kan puso.’—Isaias 65:13, 14.
[Mapa sa pahina 30]
(Para sa aktuwal na format, helingon an publikasyon)
Sweden