Mahahale Pa daw sa Sato an Siring Kaining mga Eksena?

SAEN man kita magduman sa mga aldaw na ini, nakaheheling kita nin malinaw na mga ladawan nin tension, iriwal, asin guerra. Alagad bakong katuyohan kan magasin na ini na dugangan pa an gabos na maraot na bareta na aram na nindo. Imbes, an espesyal na isyung ini iiintrodusir sa saindo an kisuerra duwang nakararangang katotoohan. Enot, na an suanoy na mga hula sa Biblia talagang patienot na sinabi an dakol sa nakakukubhan na maraot na bareta sa satong panahon; ikaduwa, na an iyo man sanang libro nin mga hula na ini patienot na sinasabi an aldaw na an mga eksena na siring kan nakaretrato digdi nakaagi na. Mayo na nin mga guerra. Mayo na nin mga pambobomba, nakatagong parabadil, nakatalbong na bomba, o terorismo. Mayo na nin mga ilo na labi-labi an pagmondo o mga dulag na daing istaran. Sarong kinaban nin tunay, nakagiginhawa sa pusong katoninongan. Mawot daw nindong maheling an siring na panahon? Sinasadol mi kamo na horophoropon an sinasabi kan Biblia. Puede kamong makanompong nin orog na karangahan dian kisa sa pinaghona nindong posible.