‘Sa Dios Ako Magpapaili’
SA ‘DELIKADONG mga panahon na ini na masakit pakibagayan,’ an mga sugot asin pangigipit padakol nang padakol. Halimbawa, an satong pagkasadiosan tibaad baloon sa pinagtatrabawohan. An satong kabinian tibaad baloon sa tahaw nin mga kaeskuela. Asin an satong integridad parateng binabalo nin sarong kinaban na marigsok sa moral.—2 Timoteo 3:1-5.
An kagsurat kan Biblia na si Asaf nabuhay man sa panahon na kadakoldakol an karatan. Ipinaghambog pa ngani kan nagkapira sa saiyang mga katemporanyo an saindang maraot na gawe-gawe. “An kapaabaw-abawan nagin kuintas sa sainda,” nagsurat si Asaf. “An kadahasan nakakapatos sa sainda na siring sa gubing. Sinda nag-oolog-olog asin nag-oorolay dapit sa maraot; sinda nagtataram sa halangkaw na estilo dapit sa pandadaya.” (Salmo 73:6, 8) Pamilyar daw an aktitud na ini?
Para sa mga nagmamawot na gibohon an tama, an siring na gawe-gawe makamomondong marhay, nakadedesganar pa ngani. “Ako dinadamat sa bilog na aldaw,” nag-agrangay si Asaf. “Iyan masakit nanggad sa sakong mga mata.” (Salmo 73:14, 16) Tibaad kaagid kaiyan an namamatean nindo, alagad dai madesesperar! Nakapanggana si Asaf sa karatan kan saiyang kaaldawan, asin magigibo man nindo an siring kaiyan. Alagad paano?
Narealisar ni Asaf na haros imposibleng manompongan an tunay na hustisya sa irarom kan bakong sangkap na pamamahala nin tawo. (Salmo 146:3, 4; Talinhaga 17:23) Kaya imbes na sayangon an saiyang mahalagang marhay na panahon, kosog, asin kayamanan sa pagmamaigot na haleon an gabos na karatan sa palibot nia, nagkonsentrar sia sa saiyang relasyon sa Dios. Ipinahayag ni Asaf: “Kun para sa sako, an pagrani sa Dios marahay para sa sako. Ibinugtak ko sa Soberanong Kagurangnan na Jehova an sakuyang pailihan.”—Salmo 73:28.
Ngonyan, an mga nakikikabtang sa maraot na mga kaugalean sa negosyo parateng nagkakamit nin materyal na mga bentaha. Tibaad ipinaghahambog pa ngani nin dakol an saindang pagbasangbasang sa mga ley nin Dios dapit sa moral. Alagad dai sinda mangingibabaw sagkod pa man. “Tunay na sinda ibinugtak mo sa dagang mahalnas,” an namasdan ni Asaf. “Pinapangyari mo na sinda maholog sa kalaglagan.”—Salmo 73:18.
Iyo, sa itinalaan na panahon nin Dios, hahaleon na an panloloko, kadahasan, asin karatan, siring man an gabos na iba pang maraot na kaugalean na kaipuhan na likayan nin tunay na mga Kristiano. Nanunuga an Biblia: “An mga maraot gagadanon, alagad idtong mga naglalaom ki Jehova iyo an magmamana kan daga.” (Salmo 37:9) Mientras tanto, otrohon logod niato an mga tataramon kan salmista na nagsabi: “Si Jehova an sakuyang gapo asin sakuyang kuta patin an Paratao nin dudulagan para sa sako. An sakuyang Dios iyo an dakula kong gapo. Magpapaili ako sa saiya.”—Salmo 18:2.