Pagkasadiosan—Pagkanorongod o Kagustohan?
“MINSAN ngani bako akong natural na sadiosan, kun beses nagkakanongod na ako iyo.” Iyan an sabi kan daing kuentang tawo na si Autolico sa The Winter’s Tale ni William Shakespeare. Iiniilustrar kaini an sarong pundamental na kaluyahan nin tawo—an satong tendensia na gumibo nin sala, na minagikan sa ‘madayang puso.’ (Jeremias 17:9; Salmo 51:5; Roma 5:12) Alagad nangangahulogan daw ini na mayo na kitang magigibo sa bagay na iyan? An marahay daw na ugale pagkanorongod sana? Dai nanggad!
Bago lumaog an mga aki ni Israel sa Dagang Panuga, si Moises nakipag-olay sa sainda mantang sinda nagkakampo sa kaplanodohan nin Moab. Iinatubang nia sa sainda an duwang malinaw na pagpipilian. Puede nindang kuyogon an mga togon nin Dios asin akoon an saiyang bendisyon o isikwal iyan asin anihon an mapait na bunga nin kasalan. (Deuteronomio 30:15-20) Sinda an mapili.
Bilang mga libre ahente moral, makapipili man kita. Mayo ni saro—kabale an Dios—na namimirit sa sato na gumibo nin marahay o gumibo nin maraot. Minsan siring, an nagkapira tibaad tamang maghapot, ‘Kun an tendensia kan satong puso maraot, paano niato magigibo an marahay?’ Bueno, an sarong dentista maingat na sinisiyasat an ngipon tangani na marisa an pagkaraot o pagkalapa bago iyan grumabe. Kaagid kaiyan, kaipuhan tang siyasaton an satong piguratibong puso tangani na hanapon an mga kaluyahan asin pagkalapa sa moral. Taano? Huli ta “gikan sa puso minaluwas an maraot na mga pangangatanosan, mga paggadan, mga pagsambay, mga pakikisaro, mga paghabon, putik na mga patotoo, mga paglanghad,” an sabi ni Jesus.—Mateo 15:18-20.
Tangani na mapreserbar an ngipon, dapat na biyong haleon kan dentista an ano man na kalapaan na maheling. Siring man, kaipuhan an determinadong paghiro tangani na mahale sa puso an “maraot na mga pangangatanosan” asin salang mga horot. Paagi sa pagbasa asin paghorophorop sa Tataramon nin Dios, an Biblia, bako sanang naaaraman niato an mga dana kan satong Kaglalang kundi nakanonood man kita na gibohon an tama.—Isaias 48:17.
Si Hadeng David kan Israel inaprobetsaran mismo an dagdag pang kinakaipuhan na tabang sa paghihingoa na gibohon an tama. Namibi sia: “Lalangon mo sa sakuya an dalisay na puso, O Dios, asin bugtakan mo ako nin bagong espiritu, sarong marigon.” (Salmo 51:10) Iyo, paagi sa mapagngayongayong pagsarig ki Jehova Dios, mapanggaganahan man niato an satong tendensia na gibohon an sala asin makukultibar an “bagong espiritu” na gumibo nin marahay. Paagi kaini, dai niato pababayaan an pagkasadiosan sa pagkanorongod. Iyan magigin kagustohan.
[Retrato sa pahina 21]
Siring sa situwasyon ni David, an pamimibi ki Jehova makatatabang sa sato na gibohon an marahay