Kun Sumongko an mga Saksi ni Jehova

Ano an maninigong gibohon nin mga Katoliko kun an saro sa mga Saksi ni Jehova sumongko sa saindang harong? An sarong dai pa sana nahahaloy na publikasyon na inandam kan Nasyonal na Opisina sa Katekismo kan Komperensia kan mga Obispong Italiano nagsasabi: “An pagsayumang makipag-olay, sa maboot na paagi alagad marigon, bakong kadaihan nin kabootan sa kasong ini.”

Bakong gabos na Katoliko minaoyon, siring sa ipinaheheling nin sarong surat na ipinadara sa diaryo na Gazzetta del Mezzogiorno hale sa sarong lalaki na nag-iistar sa Foggia, Italia:

“Ako bakong saro sa mga Saksi ni Jehova. Saro akong Katoliko. Alagad ako nagngangalas sa nagkapirang reglamento kan iglesia na iiniimponer sa mga miembro, na sinasabihan sindang idokot sa saindang pinto an mga notisya na nagpapahale sa mga Saksi ni Jehova. Total, an mga tawong ini naghuhulit sana kan Tataramon nin Dios, asin tinatabangan ninda an iba na magkaigwa nin mas hararom na kaaraman sa Biblia. Ipinagigirumdom kaini sa sako an panahon kan an Italia tamaan nin kolera asin tinawan kita nin sadol kun paano lilikayan an impeksion.

“Sa sakong opinyon, ipinaheheling kaini na an iglesia nagdidikta kan sadiri niang mga reglamento na dai kinokonsiderar an mga kamawotan kan mga miembro. Alagad sa nagkapirang taon na ngonyan, naheling ko na dawa an mga Katoliko naghaharongharong, na dinadalaw man an mga harong kan mga Saksi ni Jehova; asin pinadadagos ninda sinda, na nakikipag-olay sa sainda, na dai sinasayumahan an siisay man.”

Dai pinipirit kan Mga Saksi ni Jehova an mga tawo na akoon an saindang mensahe. Imbes, hinihingoa nindang ihiras sa iba an paglaom na itinatao kan Tataramon nin Dios na sainda mismong nanompongan na nakararanga sa masakit na mga panahon na ini. Paagi sa pagharongharong, siring man sa pakikipag-olay sa mga nanunuparan ninda sa tinampo, ihinihiras kan Mga Saksi ni Jehova an maogmang bareta kan Kahadean nin Dios sa mga gustong maghinanyog.​—Mateo 24:14; Gibo 5:​42; 17:17.