Nanindogan Sinda nin Marigon sa Tahaw kan Paglamag nin Nazi
AN MAYONG takot na integridad kan Mga Saksi ni Jehova sa Nazi Alemania kabaliktaran na marhay kan nagin paninindogan kan mga iglesia nin Kakristianohan. Kinomentohan ini kan propesor sa historya na si John Weiss sa saiyang librong Ideology of Death. Sia nagsurat:
“Kan 1934 iininsistir kan iglesia Ebangheliko na an mga Nazi dapat na ‘akoon kan Luteranismo,’ asin pinasalamatan ‘an Kagurangnan na Dios’ sa pagtao sa mga Aleman nin sarong ‘banal asin mapagtitiwalaan na supremong kagurangnan.’ . . . Nagsurat an sarong Protestanteng obispo sa saiyang klero, ‘[Si Hitler] isinugo sa sato nin Dios.’” Ipinadagos ni Weiss: “An iglesia Metodista sa Alemania . . . uminoyon ki Obispo Dibelio na ilinigtas ni Hitler an Alemania sa nagdadangadang na rebolusyon kan mga Bolshevik, na nagtatao nin katoninongan asin karigonan . . . Pinatanidan kan iglesiang Mormon an mga miembro kaiyan na an pagtumang ki Hitler pagbalga sa ley nin Mormon.” Asin idinugang nia: “Sinabihan an mga Katoliko na sagradong obligasyon na kumuyog sa bagong estado, sarong obligasyon na dai noarin man hinale maski pakatapos na maaraman kan klero an makatatakot na marhay na mga pangyayari sa sirangan.”
Alagad kumusta man an Mga Saksi ni Jehova? Idinodoon ni Propesor Weiss na “bilang sarong grupo, solamente an Mga Saksi ni Jehova an kuminontra sa mga Nazi.” “Rinibo sa sainda an nakarsel,” an pagpapadagos ni Propesor Weiss, “alagad ta an siisay man na Saksing ipinadara sa kampo de konsentrasyon puede kutanang napaluwas paagi sana sa pagpirma sa sarong dokumento na tinatalikdan an saiyang pagtubod.”
Mapadapit sa integridad kan Mga Saksi ni Jehova, nagkokomento si Propesor Weiss: “An saindang halimbawa nag-iilustrar kan daing kaagid sa pagkadeterminado asin pusoan na puersa na yaon sa enot na Kristianismo bago iyan gibohon na institusyon asin an mga kapanugaan sa sosyedad nakapangibabaw sa kamawotan na mamuhay na dai nakikikompromiso. Siring sa isinurat nin sarong Protestanteng pastor manongod sa sainda, ‘Bakong an darakulang iglesia, kundi ining pinapakaraot asin tinutuyang mga tawo an enot na nakapanindogan tumang sa kabangisan kan Nazi, asin nangahas na tumumang sono sa saindang pagtubod.’”