Sa Kiisay na mga Panuga Kamo Makasasarig?
KAN 1893 an sarong grupo nin 74 komentarista sa sosyedad nin tawo nagtiripon sa Eksibisyon kan Kinaban sa Chicago tanganing pag-olayan an ngapit. (An lugar kaiyan maheheling sa itaas.) Sa pagtanaw paabante nin 100 na taon sagkod 1993, ini an mga prediksion ninda kabilang nin iba pa: “Dakol na tawo an mabubuhay sagkod sa edad na 150.” “Maiinaan an mga bilanggoan asin ibibilang nang dai kaipuhan an diborsio.” “An gobyerno magigin mas simple, mantang an tunay na kadakulaan perming an tendensia pasiring sa pagkasimple.”
Kaagid kaiyan, kan 1967 an sarong libro na may titulong The Year 2000 nagtao nin prediksion: “Pag-abot kan taon 2000, an mga komputer posibleng mapantayan, maarog, o malabihan an nagkapira sa pinaka-‘arog-tawong’ intelektuwal na mga abilidad nin tawo, na tibaad kabale an nagkapira sa saiyang artistiko asin mapag-imbentong mga kakayahan.” “An ideya nin tama sana sa presyong mga robot na naggigibo kan kadaklan na trabaho sa harong . . . garo baga rasonableng marhay pag-abot kan taon 2000.”
An kawaran nin abilidad kan katawohan na patienot na maaraman an mga mangyayari sa ngapit kabaliktaran nanggad kan abilidad nin Dios. Halimbawa, ikomparar an naenot na mga prediksion sa ihinula kan Biblia haros 20 siglo na an nakaagi mapadapit sa satong kaaldawan: “An mga tawo magigin mga mamomoton sa sainda man sana, mga mamomoton sa kuarta, mga pangahas, mga maabhaw, mga paralanghad, mga masumbikal sa mga magurang, mga daing utang na boot, bakong maimbod, dai nin natural na kapadangatan, dai maoyonan, mga parapakaraot, mayong pagpopogol sa sadiri, maringis, mayong pagkamoot sa karahayan, mga parapasaloib, mga matagas an payo, mga mahambog, mga mamomoton sa kasingawan imbes na mga mamomoton sa Dios, na may porma nin diosnon na debosyon alagad nagpapainda sa kapangyarihan kaiyan.”—2 Timoteo 3:1-5.
An hulang ini kan Biblia manongod sa “huring mga aldaw” saro sana sa dakol na naotob na sa satong kaaldawan. Ihinula kan Tataramon nin Dios na kabale sa “tanda” kan presensia ni Jesus an guerra mundial, mga kakulangan nin kakanon, peste, linog, asin an pambilog na kinaban na paghuhulit kan maogmang bareta kan Kahadean nin Dios.—Mateo 24:3-14; Lucas 21:11.
An dai nasasalang pagkaeksakto kan mga panuga nin Dios pinahiro an sarong kagsurat sa Biblia na magpahayag kaidtong dakol nang siglo an nakaagi: “Ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob sa saindo. Mayo ni sarong tataramon sa mga iyan an nasudya.”—Josue 23:14.
Iyo, makasisierto kita na mangyayari sa dai na mahahaloy an gabos na panuga nin Dios. Tataposon kan Kahadean nin Dios an helang, krimen, adiksion sa droga, gutom, asin guerra—an bilog na daga magigin sarong paraiso. (Salmo 37:10, 11, 29; Kapahayagan 21:3, 4) Makalalaom kamo sa kaotoban kan hulang ini! Iyan gikan sa satong Kaglalang, “na dai makakapagputik.”—Tito 1:2; ikomparar an Hebreo 6:13-19.
[Pasasalamat para sa pinagkuanan kan retrato sa pahina 32]
Cleveland State University Archive