Bareta kan mga Parabalangibog kan Kahadean

Nag-oomaw sa Dios an mga Hoben sa Demokratikong Republika nin Congo

MGA siglo na an nakaagi, may init na inimbitaran kan salmista an mga hoben na umiba sa pag-omaw sa Hade sa panahon na daing sagkod: “Kamong hoben na mga lalaki asin kamo man na mga daraga, kamong gurang na mga lalaki kaibanan nin mga aking lalaki, pag-omawon . . . an ngaran ni Jehova, huli ta an saiyang ngaran sana an halangkaw na dai maaabot.” (Salmo 148:​12, 13) An minasunod na mga eksperyensia hale sa Demokratikong Republika nin Congo itinatampok an daing kaagid na pribilehiong ini.

• An kasero nin sarong espesyal payunir paborable an nagin impresyon sa gawe-gawe kan Mga Saksi ni Jehova. Sa siring tinogotan nia an mga Saksi na adalan sa Biblia an saiyang singko anyos na aking babae, si Fifi. Pakatapos na maobserbaran an pag-oswag ni Fifi sa pag-adal sa My Book of Bible Stories,a tinogotan sia kan saiyang ama na umatender sa mga pagtiripon sa Kingdom Hall. Duman, nanodan kan aking si Fifi an mga awit na pan-Kahadean sa songbook kan mga Saksi. Espesyalmenteng gusto nia an awit numero 4, na may titulong “God’s Promise of Paradise” (sa Bicol, “Panuga nin Dios na Paraiso”).

Sarong aldaw nagdesisyon an ama ni Fifi na ipag-iba sia sa simbahan kaini. Sa pagngalas kan gabos, nagsayuma si Fifi na umawit kan mga awit sa simbahan. Taano? Huli ta para sa saiya an mga inaawit sa simbahan kan saiyang ama bakong kaoyon kan nanodan nia sa saiyang pag-adal sa Biblia. Imbes, may kapusoan na inawit nia an saiyang paboritong awit na pan-Kahadean.

Pakalihis nin nagkapirang bakong mapangganang pagprobar na liwaton an saiyang isip, nagdesisyon an mga namomoon sa iglesia na iekskomulgar an singko anyos na si Fifi! Sa ibong kan pagmaltratong ini, nagdanay na kalmado an saiyang ama. Ipinag-orgolyo nia na nanindogan nin marigon si Fifi sa kun ano an saiyang pinaniniwalaan. Boot kan ama asin ina ni Fifi na magpadagos sia sa pakikiasosyar sa Mga Saksi ni Jehova.

• Kan magdesisyon an sarong tin-edyer na lalaki na an ngaran Lukodi na makipag-adal kan Biblia sa Mga Saksi ni Jehova, kontrang marhay an saiyang ama. Sa sarong okasyon kan nag-aandam si Lukodi sa pagpasiring sa sarong pagtiripon sa Kingdom Hall, hinuma sia nin sundang kan saiyang ama. Sa saro pang okasyon pinakol si Lukodi nin bala kan saiyang ama, na nakalugad nin hararom sa saiyang likod. Sa ibong kan grabeng pagtumang, nagdanay na marigon si Lukodi sa saiyang desisyon na magin saro sa Mga Saksi ni Jehova. Sia nagpadagos sa pag-oswag asin nabautismohan. Ngonyan naglilingkod na sia bilang regular payunir.

Si Sona, an ngohod na tugang na babae ni Lukodi, naghangang marhay sa paninindogan kan saiyang tugang na lalaki kaya sia man nagpoon nang makipag-adal kan Biblia sa Mga Saksi ni Jehova. Minsan siring, tangani na olangon sia sa pag-adal, pinaeskuela si Sona kan saindang ama sa saro pang baryo, na duman mayong mga Saksi. Alagad ta ugale na ni Sona na ipakipag-olay sa iba an dapit sa mga bagay na nanodan nia. Bilang resulta, nagin man interesado an saiyang pinsan.

Kan madangog kan mga Saksi sa kataed na baryo an manongod sa paghuhulit ni Sona, dinalaw sia ninda asin iinareglo na sia magkaigwa nin regular na pag-adal sa Biblia. Padagos siang nag-oswag asin dai nahaloy uminiba sa saiyang tugang na lalaki bilang nagdusay, bautisadong Saksi ni Jehova. Dugang pa, an saiyang pinsan saro na ngonyan na dai pa bautisadong parahayag, asin may ginigibo nang pag-adal sa libro sa baryong ini.

Kanigoan karahay asin kanakarerepresko kun minaiba an mga hoben sa pag-omaw sa ngaran ni Jehova!

[Nota sa Ibaba]