Sarong Nakapupukaw sa Isip na Simbag
AN Catholic Herald, sarong diaryo kan Katoliko Romano sa Britania, nagpublikar kasuarin pa sana kan minasunod na surat hale sa sarong parabasa sa Wales: “Sarong banggi, duwang Saksi ni Jehova an uminabot sa sakong pinto. Nahimo kong sabihon na an Iglesia Katolika an naggarantiya sa pagkamasasarigan kan Bagong Tipan na saindang kinotar. Nasorpresa ako kan an saro sa sainda uminoyon. ‘Iyo,’ an sabi nia, ‘ginagarantiyahan nindo iyan alagad dai nindo sinusunod iyan. Si Jesus nagsabi, “kamo magkaminorootmootan siring kan pagkamoot ko sa saindo,” alagad naggagaradanan kamo. Sa nakaaging guerra, an mga Katoliko guminadan nin Katoliko, alagad daing Saksi ni Jehova an guminadan nin [kapwa] Saksi.’ Ano an magigibo ko kundi an umoyon? Paano kami makapamimibi na magkasararo kaiba kan samong ‘nakasuway na mga tugang’ kun mayo nin tunay na pagkasararo sa tahaw niamo? Bako daw na maninigo nguna niamong ikorehir an iskandalong ini?”—Juan 15:12.
An duwang guerra mundial sa ika-20 siglong ini parehong puminoon sa Kakristianohan asin guminadan nin mga 50 milyones sagkod 60 milyones katawo. Pero sadiosan na masasabi na an Mga Saksi ni Jehova dai nakikabtang sa mga guerrang idto, ni sinda imbuelto sa arin man na mga iriwal na nangyayari ngonyan. Paano ini nagin posible? Makikinabang kamo kun orog pa nindong aaramon an manongod sa mapuersang bogkos kan Kristianong pagkamoot asin pagkasararo na yaon sa labi sa limang milyon na Saksi ni Jehova sa bilog na kinaban.—Isaias 2:4.
[Pasasalamat para sa pinagkuanan kan retrato sa pahina 32]
Retrato kan U.S. National Archives