Daing Girong Nindang Inoomaw an Saindang Kaglalang

AN MGA pagsolnop nin saldang natural nang nakaaakit. Alagad an saldang na minababa sa likod kan napapalaen na bukid na ini sa Apuan Alps sa Tuscany, Italia, totoong daing kaagid na tanawon.

Kun hehelingon sa harayo, an saldang garo nahoholog sa bukid imbes na minababa sa likod kaiyan. Taano? Huli ta an alitoktok kan bukid igwa nin natural na arko na garo iyan tinibtib sa bukid. Tunay na an rawis na ini naako an ngaran kaiyan, Monte Forato​—an Linagbas na Bukid. Huli kan pag-itok kan daga sa saldang, duwang beses sana kada taon puedeng maheling kan mga magtatanaw sa arko na an saldang garo nahoholog sa Monte Forato.

Arog kan iba pang kabtang nin paglalang, an daing buhay na kalangitan inoomaw an saindang Kaglalang. Paano? Sa parehong paagi na an sarong magayon na ipininta puedeng magtao nin kaomawan sa pintor na guminibo kaiyan. An mga bagay sa kalangitan garo man sana nagtataram dapit sa kapangyarihan, kadonongan, asin kamahalan ni Jehova. Siring sa pagkasabi kaiyan kan salmista, “an kalangitan nagpapahayag kan kamurawayan nin Dios; asin an gibo kan saiyang mga kamot ipinagsasaysay kan kahiwasan.” (Salmo 19:1; 69:34) Mantang an saldang asin iba pang daing buhay na mga bagay nag-oomaw sa saindang Kaglalang, gurano pa daw kita!​—Salmo 148:​1, 3, 12, 13.