Mga Doktor, mga Huwes, Asin mga Saksi ni Jehova

KAIDTONG Marso 1995, an Mga Saksi ni Jehova nag-isponsor nin duwang seminar sa Brazil. An katuyohan? Tanganing hagadon an pagkooperar kan mga personahe sa medikal asin legal kun an pasyente sa ospital saro sa Mga Saksi ni Jehova asin dai puedeng umako nin pag-ineksion nin dugo.​—Gibo 15:29.

Makamomondo, sa nagkapirang kaso dai inintindi kan mga doktor an kagustohan kan mga pasyenteng Saksi asin naghingoa na kumua nin pagboot kan korte tanganing ipirit an pag-ineksion nin dugo. Sa siring na mga situwasyon ginamit kan mga Saksi an ano man na makukuang legal na paagi tanganing protehiran an saindang sadiri. Minsan siring, mas gusto ninda an kooperasyon kisa sa komprontasyon. Sa siring, idinoon sa mga seminar na igwa nin dakol na pagpipilian na kasalihid sa pagbolong na minagamit nin pag-ineksion nin magkakaparehong dugo asin an Mga Saksi ni Jehova naoogmang akoon ini.a

An sarong miting kan Rehional na Konseho nin Medisina sa São Paulo sinuportaran na an paninindogan kan mga Saksi. Kan Enero 1995, iyan nagdesisyon na kun sayumahan an pagbolong na irinerekomendar nin doktor, an pasyente igwa nin diretsong magsayuma dian asin magpili nin ibang doktor.

Kaomaw-omaw, ginatos na ngonyan sa medikal na propesyon sa Brazil an andam na gumibo nin pagbolong na dai magamit nin dugo sa saindang mga pasyente na minahagad kaiyan. Poon kan mga seminar kan Marso 1995 narisang marhay an pag-oswag kan kooperasyon sa tahaw kan mga doktor, huwes, asin Mga Saksi ni Jehova sa Brazil. Kan 1997 an medikal na magasin sa Brazil na Âmbito Hospitalar nagpublikar nin sarong artikulo na nag-iinsister na igalang an mga diretso kan Mga Saksi ni Jehova manongod sa saindang paninindogan sa isyu nin dugo. Lakop nang rinerekonoser ngonyan na, siring sa pagkasabi kan Rehional na mga Konseho nin Medisina para sa mga estado nin Rio de Janeiro asin São Paulo, “an obligasyon kan doktor na protehiran an buhay kan saiyang pasyente maninigo na dai lumihis sa saiyang obligasyon na idepensa an diretso kan pasyente na pumili.”

[Nota sa ibaba]