Inomaw an Sarong “Ekstraordinaryong” Kombension

AN SARONG parabareta sa radyo sa Lima, Peru, igwa nin seryosong mga pagduda manongod sa Mga Saksi ni Jehova. Minsan siring, pakatapos na mag-atender sa saro kan saindang pandistritong mga kombension, an saiyang aktitud dramatikong nagliwat. Sa katunayan, sia huminangang marhay kaya sia nagtao nin paborableng mga komento sa saiyang mga paradangog sa radyo. An minasunod mga kabtang hale sa saiyang sinabi:

“An kombension totoong ekstraordinaryo. Mayo ni sarong pidaso nin papel sa salog ni paratinda sa palibot. Mayo nin mga surusuan sa trapiko. Limang ribo may duwang gatos na tawo an nagduman sa istadyum sa sadiri nindang gastos, na an kada saro igwa nin darang timba, trapo, panhale nin alpog, panhakot nin ati, sigid, eskoba, guantis, asin panlimpiang sabon sa paghugas patin paggusgos kan lugar. An ano man na kaipuhan na pintahan, pinipintahan ninda. Asin saen hale an kuarta? Hale mismo sa sainda! Kun impormaran sinda manongod sa sarong bagay na kaipuhan na gibohon, gabos sinda tolos-tolos na minabotbot sa saindang mga bulsa tanganing magtao. Sinasabi ko saindo, an Iglesia Katolika nagtotorog pag-abot sa siring na mga bagay. Pinepelisitar ko an Mga Saksi ni Jehova asin an mga nagkokoordinar kan okasyon na ini. Asin gusto kong sabihon sa sainda hale sa kairairaromi kan sakong puso, Tabangan logod kamo nin Dios patin bendisyonan kamo.”

Sa mga siudad sa bilog na kinaban ngonyan na taon, an Mga Saksi ni Jehova magkakaigwa kan “Diosnon na Paagi nin Pamumuhay” na Pandistritong Kombension. Magigin presente daw kamo?

[Blurb sa pahina 32]

“Mayo ni sarong pidaso nin papel sa salog”