Taano ta Dai Umiba sa Sainda?

SI Ndjaukua Ulimba 73 anyos, asin kan nakaaging taon sia nagbaklay nin mga 450 kilometros. Linakaw nia an bilog na distansiang iyan, asin inabot sia nin 16 na aldaw.

An may edad nang lalaking ini nagbaklay nin halawig tanganing mag-atender sa saro kan taonan na mga kombension kan Mga Saksi ni Jehova. Pakatapos kan kombension, na labi-labi an kagayagayahan asin napakosog sa espirituwal, naglakaw liwat sia papuli​—16 na aldaw giraray. Bawi daw an paghihingoa? Iyo nanggad! Pirang taon nang ginigibo ni Ndjaukua Ulimba an pagbaklay na ini taon-taon.

An Aprikanong ini saro sa labing 15 milyones hale sa labing 230 kadagaan na nag-atender sa mga kombension kan Mga Saksi ni Jehova kan nakaaging taon. Siempre, an kadaklan dai man kinaipuhan na maglakaw nin pirang aldaw pasiring sa lugar kan kombension. An mayoriya nag-abot na sakay sa kotse, auto, tren, o eroplano. Saro daw kamo sa sainda?

Ngonyan na 1998, magkakaigwa liwat nin mga kombension sa bilog na kinaban, na kadaklan durante kan mga bulan nin tig-init (o durante nin panahon nin tigmara). Kun itotogot nin salud, posibleng lalakawon giraray ni Ndjaukua Ulimba an iyo man sanang halawig na distansia tanganing makaatender. Sia asin an milyones na iba pa makakadangog nin praktikal, nakapakokosog sa pagtubod, asin nakapababagsik na programa. Para sa gabos na maatender, an kombension magigin tampok na kabtang kan taon. Kamo mainit man na iniimbitaran na mag-atender. An Mga Saksi ni Jehova sa saindong lugar maoogmang sabihon sa saindo an lugar kan kombension na pinakaharani sa saindo.