An Marahay na Gawe-Gawe Nagbubunga nin Pag-omaw

AN PERYODIKO sa Italia na La Gazzetta del Mezzogiorno kinomendaran an Mga Saksi ni Jehova huli sa pagpublikar kan artikulong “Matera​—City of Unique Cave Dwellings.” An artikulong ini nagluwas sa isyu kan magasin na Awake! na Hulyo 8, 1997, na igwa nin mahiwas na sirkulasyon sa dakol na lenguahe. An Awake! sa presente tinatradusir sa 81 lenguahe asin nasa sirkulasyon na labing 19 milyones na kopya sa bilog na kinaban. An peryodiko nagkomento na an Awake! nagtao nin dai pa malampasan na estadistika “kun dapit sa mga kampanya sa pag-anunsio tanganing suportaran an makasaysayan asin artistikong pamana kan siudad [nin Matera].”

Inomaw kan peryodiko an mga Saksi may koneksion sa “Pagtubod sa Tataramon nin Dios” na Pandistritong Kombension na ginibo sa Matera kan 1997. Ipinaliwanag kan artikulo na nahimo kan mga Saksi na “palaogon an 4,000 katawo sa XXI Settembre Stadium [kan siudad] sa katahawan nin tig-init asin balad sa nakapapasong saldang; sinda mismo an nag-asikaso kan paglinig, pagpinta liwat, asin kan pundamental na pagpakarhay kan sentro nin isport na ini (partikularmente an mga pasilidad sa kasilyas) na biyong daing bayad, na tinataparan an gastos sa pagbakal kan kaipuhan na materyales.”

An Mga Saksi ni Jehova nagmamaigot na magin marahay na mga kataed. (Mateo 22:​37-39) Sinusunod man ninda an Makakasuratan na konseho: “Papagdanayon na marahay an saindong gawe-gawe sa tahaw nin mga nasyon, tanganing, . . . tibaad huli sa saindong marahay na mga gibo na saindang naheheling pamurawayon ninda an Dios sa aldaw kan saiyang pagsiyasat.”​—1 Pedro 2:12.