Bareta kan mga Parabalangibog kan Kahadean
Pag-aprobetsar sa Lambang Oportunidad
AN Mga Saksi ni Jehova midbid sa bilog na kinaban huli sa saindang gibohon na pagtotokdo sa Biblia. Alagad sinda nagkokondukta man nin mga programa na nagtatao nin iba pang mga pakinabang sa sosyedad. An serbisyo publiko na ini inako nin marahay, siring kan ipinaheheling kan minasunod na mga eksperyensia sa Ecuador.
◻ An administrasyon nin sarong dakulang pabrika nin bubog gustong mag-organisar nin sarong kurso manongod sa pampamilyang mga pamantayan sa buhay para sa saindang mga empleyado. An direktor kan departamento sa mga tawohan inimbitaran an nagkapirang padi na Katoliko na magpartisipar alagad ta mayo nin simbag. Sinabihan sia nin sarong padi na pipira sanang padi an kualipikado na magpahayag dapit sa siring na topiko kaya posibleng mayong makua. Kan madangog ini, an sarong empleyadang Saksi nakipag-areglo sa sarong tugang na lalaki na parateng naghuhulit sa lugar nin negosyo na dalawon an pabrika.
Kan sunod na aldaw mismo, dinolok kan Saksi an direktor kan departamento sa mga tawohan na may iprinoponer na kurso sa pag-adal. Sarong lista nin mga topiko an kinua sa manlaenlaen na publikasyon kan Watch Tower Society. Naghanga an direktor. Sia nagpili nin tolong topikong mapag-oolayan—relasyon nin tawo, etika sa lugar nin trabaho, asin etika sa laog nin pamilya. Dangan ginibo an mga areglo tanganing ikapaliwanag an impormasyon sa gabos na empleyado.
An mga empleyado pinagbaranga sa pitong grupo na may 30 an kada saro, dangan pakatapos kaiyan tolong kualipikadong tugang na lalaki an nag-atubang kan impormasyon sa sainda. Ano an mga resulta? Dakol-dakol na empleyado an naghagad na dalawon sa saindang harong, asin 216 na pantabang sa pag-adal sa Biblia an ikinapasakamot. Naghangang marhay an administrasyon kaya hinagad ninda kun puedeng mag-andam an mga Saksi nin saro pang serye nin mga pahayag.
◻ Kasuarin pa sana, an Ecuador nagpasar nin sarong ley na nagtotogot na magtokdo nin relihion sa eskuelahan. An sarong tugang na misyonera nagdolok sa sarong babaeng superintendente nin sarong eskuelahan na elementarya asin naghapot kun kumusta na an pag-implementar kan bagong ley. Ipinaliwanag kan superintendente na prinobaran nang ponan an sarong programa manongod sa pagsamba ki Maria alagad daing nangyari. Kan an tugang na babae magkomento na an siring na pagsamba puedeng mag-atubang nin mga problema para sa mga aki na bakong Katoliko, an superintendente nag-oyon. “Sa ibong na lado,” an sabi kan misyonera, “igwa kami nin programa para sa pagtotokdo nin moral na mga prinsipyo hale sa Biblia na dai nag-oobligar sa sarong tawo na akoon an sarong partikular na relihion.” An superintendente nagsimbag: “Noarin ka puedeng magdigdi? Pakalihis nin duwang aldaw?” Pakatapos na ipaheling kan misyonera an saiyang librong Paghinanyog sa Dakulang Paratokdo, napagdesisyonan na kokonsideraron ninda an kapitulo na “Maogma an mga Matoninong.”
Sa saiyang pagbalik, an misyonera naggamit nin tolong oras sa pagdalaw sa pitong laen-laen na kuarto kan klase mantang naghihinanyog an superintendente. Pakatapos nin sesyon sa sarong klase sa ikalimang grado, an saro sa mga estudyante nagsabi: “Miss, siertohon tabi nindo na dalawon an ikaanom na grado. Pirme sindang nagpoprobar na kastoran kami asin nagpopoon nin iriwal!” An sarong maestra nagkomento: “Mahalagang marhay na topiko an kadahasan. Kaipuhan niato an dakol pang panahon tanganing pag-olayan an bagay na ini.”
Ginibo an mga areglo para sa mga pagdalaw liwat sa eskuelahan tanganing ipaliwanag an mga tema na siring sa pagigin makinuyog asin pagputik. Sagkod sa presente, an mga resulta nagin mapangganang marhay. Ngonyan kun an tugang na misyonera naglalakaw sa tinampo, an mga aki nagdadaralagan pasiring sa saiya tanganing taratarahon sia asin naghahapot dapit sa Biblia. An iba may pag-orgolyo na ipinamimidbid sia sa saindang mga magurang. Dugang pa, sarong pag-adal sa Biblia sa harong an naponan sa duwang eskuela.