An Pagtaram daw Nindo—Nakalulugad o Nakabobolong?

SA MASAKIT na mga panahon na ini, bako nanggad na makangangalas na an dakol “nababaak an puso” asin “nasasakitan an espiritu.” (Salmo 34:18) Sa siring, sa mga tataramon ni apostol Pablo, igwa nin danay na pangangaipo na “magtaram na may pagranga sa mga kalag na nagmomondo nin makuri” asin “suportaran an maluya.” (1 Tesalonica 5:14) Alagad kumusta kun an satong kapwa magkasala sa sato o maggibo nin sarong bagay na maraoton? Sa siring na situwasyon, tibaad kita magsaboot na kita may katanosan na sagweon nin makuri an indibiduwal. Minsan siring, angay sanang magmaan. An hatol, dawa balido, puedeng makadanyar kun iyan itao sa makuring paagi. An Talinhaga 12:18 nagsasabi: “Igwa nin nagtataram na dai iniisip arog kan mga bono nin espada.”

Kun siring, kun kita magpoon na magtao nin pagkorehir o maghusay nin dai pagkasinabotan, mahalagang marhay na girumdomon an ikaduwang kabtang kan Talinhaga 12:18: “An dila kan madonong bolong.” Pirmeng hapoton an saindong sadiri, ‘Kun ako nangangaipong ikorehir, anong tratamiento an gusto ko?’ An kadaklan sa sato mas naghihimate sa pagparigon sa boot kisa sa pagtatsar. Kaya magin matinao nin komendasyon. Ini sa parate makaeenganyar sa nagkasala na umoswag, asin sia mas posibleng magpapasalamat sa ano man na tabang na itinao.

Abaa kamahalagang marhay na pirmeng ibanan nin kahoyoan an satong mga tataramon! An nakabobolong na mga tataramon magpapangyari sa nagdadangog na makamate nin siring kan sa salmista, na nagsurat: “Kun hampakon ako kan matanos, iyan magigin mamomoton na kabootan; asin kun sagweon nia ako, iyan magigin lana sa payo, na dai hahaboan kan sakuyang payo.”—Salmo 141:5.