Sarong “Halimbawa nin Pagkasararo Asin Pagkanitugang”

Iyan an pagkaladawan nin sarong babae sa gawe-gawe kan Mga Saksi ni Jehova pakaagi nia sa makologon sa boot na pagkawara nin sarong miembro nin pamilya. Saiyang ipinaliliwanag:

“Sa ngaran kan sakong pamilya asin ako mismo, gusto kong pasalamatan an mga Saksi sa Italianong kongregasyon sa Freiburg, Alemania. Apuera sa tugang kong si Antonio asin sa saiyang agom, si Anna, an sakong pamilya bakong Mga Saksi ni Jehova. Haloy mi nang tinatatsaran an pinili nindang relihion, minsan ngani iyan iginagalang mi sa gabos na panahon.

“Minsan siring, ngonyan dapat na bagohon mi na an samong isip. Sa katunayan, nakaeksperyensia kami nin sarong halimbawa nin pagkanitugang asin pagkamoot na dai mi lamang lalaoman.

“Makamomondo, si Anna nagadan nin mayo pa sa panahon sa sarong aksidente sa tinampo. Mantang kami nag-iistar sa Italia, limitado sana an nagibo niamong pakikidamay sa tugang kong si Antonio asin sa saiyang mga aki. Pero an mga tugang niang Saksi tuminabang. Sia tinabangan ninda paagi sa saindang presensia, sa saindang mga tataramon, sa saindang pagtubod, sa saindang pisikal, moral, asin pinansial na suporta. Mantang dai ko mapasasalamatan nin personal an kongregasyon, boot kong pasalamatan sinda paagi sa saindong magasin para sa saindang halimbawa nin pagkasararo asin pagkanitugang na dai niamo malilingawan.”

Inaapresyar an maboot na sinabi kan babaeng ini. Arog kan namasdan nia, an Mga Saksi ni Jehova internasyonal na kasararoan nin magturugang. (1 Pedro 2:​17) Kinukultibar ninda an makosog na bogkos nin kapadangatan sa tahaw ninda, sa pakaaram na an pagkamoot “sangkap na bogkos nin pagkasararo.” (Colosas 3:14) Dawa sa pinakamakaturotristeng mga kamugtakan, na puedeng mangyari sa sato gabos, an Mga Saksi ni Jehova nagdadanay na dayupot sa Dios asin sa saiyang banwaan.​—Talinhaga 18:24; Eclesiastes 9:​11; Juan 13:​34, 35.