Siisay an Dapat Basolon?

An dakol ibinabasol sa Dios an saindang mga problema. An sarong talinhaga sa Biblia nagsasabi: “An sadiring kabalisngagan nin tawo rinaraot an saiyang buhay, dangan minaraot an saiyang boot tumang sa Kagurangnan.” (Talinhaga 19:​3, The New English Bible) Pero, an pagsabi na an Dios an may paninimbagan sa grabeng mga sakit nin tawo kapareho nin pagbasol sa paraprodusir nin kotse huli sa pagigin lakop nin mga aksidente na an dahelan pagmaneho na burat.

Tinawan nin Dios an katawohan nin mahalagang giya sa saiyang Tataramon, an Biblia. Paagi sa pag-adal sa libreriyang ini nin Dios asin pamumuhay sono sa mga ley asin prinsipyo na itinatao kaiyan, malilikayan ta an dakol na natatagong peligro sa buhay. Sa kabaliktaran, an paggawe kontra sa paggiya nin Dios kapahapahamak. Halimbawa, an mga nagpapagutid, nagsisigarilyo, nagbuburat, o nagkokomiter nin inmoralidad sa parate nag-aagi nin makaturotristeng mga epekto sa salud. (Lucas 21:34; 1 Corinto 6:​18; 2 Corinto 7:1) An Kristianong apostol na si Pablo nagsurat: “Ano man an itinatanom nin tawo, ini man an saiyang aanihon; huli ta sia na nagtatanom sa saiyang laman mag-aani man nin pagkatunaw sa saiyang laman, alagad an nagtatanom sa espiritu mag-aani nin buhay na daing katapusan gikan sa espiritu.”​—Galacia 6:​7, 8.

Orog karahay nanggad na mamuhay sono sa mga ley asin prinsipyo nin Dios! Kun gigibohon ta iyan, maeeksperyensiahan ta an katunayan kan panuga nin Dios na itinaram paagi ki propeta Isaias: “Ako, si Jehova, an saimong Dios, an Saro na nagtotokdo saimo na pakinabangon an saimong sadiri, an Saro na nagpapangyari saimo na maglakaw sa dalan na maninigo mong lakawan. O kun ika sana kutana aktuwal na mag-aatento sa sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”​—Isaias 48:​17, 18.