An Gabos daw na Klerigo Nagtutubod sa Itinotokdo Ninda?

NAGADAN pa sana an agom kan babae. Ipinaliwanag kan saiyang padi na an agom nia dai man masasabing marahay tanganing dumiretso na sa langit ni masasabing maraot tanganing soloon sa impierno. Kaya, segun sa padi, kinakastigo sia sagkod na makualipikar sia sa langit. Binayadan nia an padi na mamibi tangani na an saiyang agom tibaad mas amay na mapalibre sa pagdalisay. Kontento na kaini an balo, na naghohona na an saiyang sinserong mga paniniwala kapareho kan sa padi.

Sa paghona daw nindo madedesganar an balo kun maaraman nia na an saiyang padi dai man talaga nagtutubod sa pagkastigo pagkagadan? Dakol an dai mapamugtak na maaraman na dakol na klerigo an dai nagtutubod sa kadaklan na itinotokdo ninda mismo. An National Catholic Reporter, sa pagtratar sa inapod kaiyan na “sarong mas hararom na problema nin klero kisa sa sekso,” nagsabi: “Sa tahaw kan klero sa pankagabsan, dakol an dai na nagtutubod sa pag-eksister nin Dios o sa doktrinang mga balos asin kastigo o sa pagkabuhay liwat . . . kaya an dai paniniwalang ini yaon sa kultura nin klero bilang kabtang kan atmospera kaiyan, na garo baga siring sa maating dampog.”

Arog man kaiyan na problema an inaatubang nin ibang iglesia. Ihinayag nin sarong surbey sa mga bikaryo kan Iglesia nin Inglaterra na dakol an “dai nagtutubod sa pundamental na mga kabtang kan tradisyonal na Kristianong pagtubod arog baga kan pangangaki nin sarong birhen, mga milagro ni Jesus asin kan ikaduwang pagdatong kan mesiyas,” an ibinareta kan Canberra Times sa Australia.

An parasurat manongod sa relihion na si George R. Plagenz naghapot mapadapit sa sarong ministro kun paano nia nasasabi, na may malinig na konsensia, an sarong kredo na sia mismo dai nagtutubod. Sinabi nin sarong ministro na saiya sanang sinalidahan an enot na mga tataramon kan kredo, na “minatubod ako.” Sinabi nia: “Pinoponan ko an kredo paagi sa pagsabing, ‘SINDA minatubod sa Dios na Amang Makakamhan sa gabos . . .’” An pagsaginsagin na iyan inapod ni Plagenz na “an pinakadakulang pandadaya sa nasyon.”

Makamomondo, an siring na dai paniniwala asin pagkabakong sinsero kan klero nakapadedesganar sa dakol na tawo manongod sa relihion sa pankagabsan. Alagad bako sana iyan an nakapupurisaw na aspekto kan relihion ngonyan. An kadaklan na nagsisimba tinokdoan na an Biblia iyo an Tataramon nin Dios. Mabibigla daw sindang maaraman na an nagkapirang haloy nang inaako na doktrina kan iglesia dai itinotokdo sa Biblia? Eestudyaran kan minasunod na artikulo an sarong halimbawa.